اجراءات التفويض المالي

السلام عليكم
ممكن للاخوة اللي كملو اجراءتهم يوضحوا اكثر حول
عقد الكفالة هل يختم من محمرر عقود فقط او لا
تعهد الطالب الموفد هل هو من الشئوون المحلية
استمارةبيانات الموفد ممن توقع
كذلك شهادة الميلاد والاقامة هل الاصل
والتامين الصحي لانه مطلوب ترجمة للشهادة ميلاد - اكمال الدورة العقائدية هل هي مطلوبة او لا
يعني نبي معلومة كاملة وجزاءكم الله مقدما

iهل قصدم انك لم تقم باى اجراء لغاية الان؟؟؟

حبيت انقل هذا الموضوع بدون تغييرمع جزيل الشكر لصاحب الموضوع و انشاء الله يعجبكم
أولا أهني كل المتحصلين علي الإيفاد للدراسة بالخارج
وأقول لهم ( ألف ألف مبروك )

وأتمنى أن يكون فاتحة خير عليهم وبناء مستقبل مشرف
وأهم شي النتيجة

والآن نبدأ في مشوار تجهيز المستندات المطلوبة لتنفيذ قرار الإيفاد

بسم الله

قبل كل شي يجب علي الموفد معرفة مواد لائحة البعثات

1- قرار لائحة البعثات


2- قرار اللجنة الشعبية العامة بشأن تعديل وإضافة بعض الأحكام إلى لائحة الإيفاد

وبعد ما قريت اللائحة وعرفت اللي عليك واللي ليك نتوكلوا علي الله ونبدوا ...
أولا : تمشي لإدارة البعثات الدراسية في منطقة عين زاره – الفرناج وتخش ( السلام عليكم ) وبوجهك طول لنافدة القبول وتقوللهم انك موفد للخارج بقرار رقمه (كدا) ورقمي التسلسلي (كدا) وطبعا انت تكون نبه ومفتح تبدأ مجهز صورة من القرار طبعا مش كله ، الصفحة الأولى والصفحة اللي فيها اسمك وصورة من جواز سفرك العربي + الانجليزية تعطيهملهم ويعطوك نموذج تعبيه وتحددلهم الساحة ( البلاد ) اللي تبي تقرا فيها وتوقع تعطيهولهم ويقولولك راجعنا يوم ( كدا )وإذا كان قرارك صادر عن الجامعات أو جهات عامة يقولولك راجع منذوب الجهة اللي مرشحاتك أو الجامعة اللي مرشحاتك .

المهم خلينا في الجماعة اللي عندهم مندوب نزل النماذج هذي خليها عندك هيا المفروض يعطيهالك المندوب بس أنا مجهزهالكم ديجيتال .

1- نموذج لغرض القبول .

2- نموذج لغرض التأشيرة .


3- طلب الحصول علي تذاكر السفر .

4- التأمين الصحي .

أول حاجة تعبي نموذج لغرض القبول وتوقع عليه وتعطيه للمندوب وترفق معاه صورة من جواز سفرك العربية والانجليزية .
وبعد ما تاخد ورقة الدعم المالي تبدا فيها عاد وينك يا جامعات وهات ما عندك
طبعا جامعات معتمدة مش متع مشي حالك
المهم في الوقت اللي تراسل فيه الجامعات وتستنى في القبول الأكاديمي وقبول اللغة أقرى النقص وجهز المستندات المطلوبة للإيفاد .

نجو للمستندات المطلوبة
أول شي تجهز ملفين
واحد أصلي والثاني صورة من الأوراق الأصلية


والمستندات هي :
1. المؤهل العلمي وكشف الدرجات
2. شهادة الميلاد
3. صور من كتيب العائلة
4. صور من جواز السفر
5. شهادة الوضع العائلي
6. الوضع العسكري
7. قبول لغة وأكاديمي
8. إخلاء طرف
9. عقدكفالة
10. استمار ةبيانات طالب
11. تعهدطالب
12. تأشيرة دخول دراسية

نبدو توا وحدة وحدة

بالنسبة للمؤهل العلمي وكشف الدرجات
أول حاجة تاخد شهادتك وكشف الدرجات وتمشي لمترجم قانوني واترجمهم عنده .
وبعدها تمشي لمركز ضمان الجودة في بن عاشور قريب من مصحة المختار
وتختم علي شهادتك عندهم ( طبعا لازم تكون معتمدة ) .
وبعد ما تختمها تمشي تصدق علي الترجمة في مكتب التصديق في الظهرة في جانب شركة الزويتينة وخلف فندق الودان ( سيدي عيسى )
وبعدها تمشي تختم علي شهاداتك في الخارجية في منطقة النوفليين .
وهكي تكون جهزت النقطة الأولى من مستندات تنفيذ قرار الإيفاد

نجو توا للباقي
تمشي تاخد كتيب العائلة وتمشي لمصلحة الأحوال المدنية ( السجل المدني لمنطقتك ) وتقدم في طلب شهادة بالوضع العائلي وشهادة إدارية إذا كان الكتيب ازرق ( القديم ) وبعد ما تاخدهم تطلع بوشك للمصور عدل تصور صورتين صورتين من ( كتيب العائلة شهادة الميلاد وجواز السفر والوضع العائلي والاقامة ) وبعدين تصور صور شخصية لوجهك الجميل .

وبعدين تعبي نماذج عقد الكفالة واستمارة بيانات موفد ونموذج التعهد

وتمشي لجهة العمل اللي تشتغل فيها تختم عندها استمارة بيانات موفد وبعدين تمشي لأمين المؤتمر لمنطقتك تختم عنده استمارة بيانات موفد ونموذج التعهد وعقد الكفالة وبعدين شوف أول محرر عقود معتمد تصدق عنده عقد الكفالة .
دوشة ووجع راس صح
الله غالب معليش هانت
يلا انكملوا .... يلا

بعد ما تجهز الملفين وتكون كملت موضوع القبول الأكاديمي وقبول اللغة
تعبي نموذج الدعم المالي لغرض التأشيرة وتوقع عليه وبعدين طول لعند المندوب وترفق معاه صورة من القبول الأكاديمي وقبول اللغة وصورة من جواز السفر العربية والانجليزية والوضع العائلي .
وبعدين تستنى وبعد ما تاخد رسالة الدعم المالي طول بوجهك لسفارة البلاد اللي بتمشيلها تقدم للتأشيرة وتراجي التأشيرة لين تصدرلك .
وتوا أبدى جهز في شناطيك للسفر

مازال مش من توا تمشي للمطار مازااااااااااااال

وبعد ما تصدر التأشيرة تقدم في التفويض وتعبي الطلب للحصول علي تذكرة سفر وتوقع عليه وتعطيه للمندوب وترفق معاه صورة من جواز السفر العربية والانجليزية وصورة من التأشيرة وما تنساش تعبي نموذج التأمين الصحي حتى هوا وتعطيه للمندوب
وبعدين تراجي حوالي مدة من شهر الى شهرين حسب الظروف وحضك
لما يوصل التفويض للمالية تقدملهم صورة من جواز السفر والتاشيرة ويعطوك الإبراق يسموا فيه 3نسخ
نسخة تقعد عندهم
نسختين يعطوهملك وحدة تخليها عندك والثانية تعطيهالجماعة البعثات ويقولولك راجعنا يوم ( كدا )
وبعدين تمشي ويعطوك مجموعةصور أوراق ( تعريف طالب ، إبراق من البعثات ، رسالة ربع المرتب إذا كنت من جهة عامة أو من الجامعات ) .
وبعدين تمشي للمحفوظات تعطيعم الأوراق يعطوك النسخ الأصلية من ( تعريف طالب ، إبراق من البعثات ، رسالة ربع المرتب )
وتوا هكي كملنا برنامج أوراق البعثات .
بعد ما تلقى اسمك في المالية تمشي تشري كندرة جديدة وتقعد ماشي جاي علي مبنى الوكالات وهو في نفس مبنى البعثات تشوف اسمك في القوائم المعلقة ولما تلقى اسمك تمشي للوكالة وتقوللهم لقيت اسمي في القوائم يشوفوا اسمك ويتأكدوا منه وعلي طول يعطوك نموذج تعبيه وبعدين يقولولك راجعنا يوم ( كدا ) لين يصدرولك التذكرة
وووووووووووووو بعدين تاخد تذكرة السفر
وعلي طول لم قشيشك وشناطيك وبوجهك للمطار
وماتنساش إدعي لي دعوة خير
ما تنساش ايوة ( دعوة خير )

فما أجمل الأخوة باالله ..نباتها <<< الصدق و أرضها<<< الإخلاص

موفقين بإذن الله تعالى
وسامحوني إذا كان طولت عليكم أو نقصت عليكم حاجة نسيتها
( جل من لا يسهوا )

نصيحة : راجع إدارة البعثات ديما لأن مرات يغيروا في اجرائاتهم .

بارك الله فيكي اختي للعلم انا عندي التاشيرة والان نبي نقدم على ملف التفويض والاخلاء طرف وشكرا لكي ووللاخ الذي وضح الاجراءات

أنا توا منقدم عالتفويض
بالنسبة للتأشيرة صورة من تاشيرة الموفد بس او حتى المرافقين
وهل يحتاج التفويض إفادة بأنك من المعيدين أو الأوائل وبالنسبة لشهادات انحط الأصل او تكفي صورة سكنر منهن وكذلك بقية الأوراق
وشكرا لكم

هي قولتك انقدم توا خير
مشككور وااجد

شكرا خوي the good
وفعلا الملف المميز فكرة جميلة
بس عندي سؤال حول الصور هل في مواصفات اولا
وبالنسبة لعقد الكفالة محرر العقود بس
تعهد موفد و استمارة بيانات الطالب قسم الشئون المحلية
يعني مفيش حاجة للذهاب للجامعة عارف لاني انا نسكن في بنغازي وندرس في درنه يعني ممكن نمشي 300 كيلو عالفاضي
وبالنسبة لشهادة الوضع العائلي وشهادة الاقامة وشهادة الميلاد والشهادة الادارية
انا عندي كتيب خضر هل يغني عن احد هذ الاوراق اولا
وبارك الله فيك وجعلهن في ميزان حسناتك

لماذا يأخد احراء التفويض شهر؟

السلام عليكم ؛؛؛
شكرا لك اخي THE GOODوجعلها في ميزان حسناتك
ربي يفتحها قدامك زي ماتساعد في غيرك

عندي سؤال ممكن يعتبره البعض غريب أو غبي ؟!

في نموذج "استمارة موفد"
في خانة التكاليف المالية =؟
والجهة التي تتحمل التغطية المالية= ؟

ماذا أكتب بهما؟؟؟
علما أني مرشحة من ضمن القرار 469

وشكرا

شكرا على التوضيح

لسلام عليكم
نبي نسأل عن اخلاء الطرف لانهم اعطونى ست نسخ مش عارفه النسخ السته المفروض وين نحطهم وقداش نحط نسخه في ملف التفويض scratch
وشكرااااااااا