بخصوص القنصليه الامريكيه

السلام عليكم اخوتي الطلبه واعضاء المنتدي الموقر
فى الوقت الذي نشكر ادارة المنتدي على الجهوذ االمبذوله والمساعدات المقدمه للطلبه الليبيين
الموضوع بخصوص السفاره الامريكيه
اليوم كنت فى مكتب بنقدم على التاشيره الكنديه
وهوا ياخد مني فى المعلومات قالى هل سبق وعندك رفض قبل قتله ايه
سالني وين قتله الاسفاره الامريكيه فى الاردن
المهم قالى بتفتح الاسبوع الجاي
سالته شن مصدرك قالى عندي حد يشتغل فى السفاره
الخبر هده كان مفرح وصحة الخبر راهى على الشخص اللى قاللى الخبر هذه
بالله لو فيه حد عنده شخص يشتغل مع البعته الامريكيه يتاكد
وان شاء الله خير يا موفدين

كل مره ايقولو وقت مره نهاية 4مره بداية 5 ودوه مش معروفه بس يا خوي ممكن نعرف ليش رفضوك في سفارة الامريكية

فعلا انا سمعت من صديقي كان في امريكا انهم حيبدوا في بداية شهر 5

ومصدر اخر من السفارة قال مزال لان حتى لو جهزوا المبنى توا حياخذ وقت حتى يبدوا يصدروا التأشيرات لليبيين

Jori rose 222 كتب:كل مره ايقولو وقت مره نهاية 4مره بداية 5 ودوه مش معروفه بس يا خوي ممكن نعرف ليش رفضوك في سفارة الامريكية

عطتني ورقه زرقاء ومخلص اللى فيها انى انا غير مؤهل للدراسه فى امريكا
مع انه الشهاده التانويه متاعي ممتاز وموفد اخري وجايب كل الاوراق متاعي المهمه
بس نحس فى الغلط اللى رفضتني على سباه
انه انى كلمتها بالانجليزي
وجاوبتها بطلاقه هي تفاجئت لقت عندي حتى اللكنه وقعدت تسأل فيا اسئله واجده
بس اخر سؤال قتلى انتا اول ماتوصل امريكا شن بتقرا قتلها الكورسات التحضيريه لامتحان الايليتس
قالتلي لاكن انتا الانجليزيه متاعك ممتازه
قتلها هذا اللى تعلمته من المدرسه الاعداديه والتانويه وكذبت عليها قتلها مستواى بيقينر b
بعدها على طول قالتلى حظ اوفر فى المره القادمه تقدر تقدم مره تانيا مستر احمد انتا غير مؤهل للدراسه وعطتني فورم ازرق وطلعت وسيبتلها الفورم الازرق والاى توينتي وروحت
ههههه بعدها بحوالى عشره ايام بعتولى رساله قالولى تعالا للسفاره فى اى وقت باش تستلم الاى توينتي متاعك

Ahmed Elzway كتب:فعلا انا سمعت من صديقي كان في امريكا انهم حيبدوا في بداية شهر 5

ومصدر اخر من السفارة قال مزال لان حتى لو جهزوا المبنى توا حياخذ وقت حتى يبدوا يصدروا التأشيرات لليبيين

هالخبر هذه منتشر واجد عند الناس بس انا شخص وعندي فيه ثقه قال قاللى فلان زوجته تشتغل فى السفاره انهم حيبدو فى شهر خمسه
وصاحب المكتب اللى قدمت عليه التاشيره الامريكيه قاللى انه الاسبوع الجاى حيفتحو
والله اعلم وعلى مسؤولية هالشخصين
نحنا نقولو ان شاء الله ربي يسهلها لنا