تجربة مسافر

السلام عليكم ورحمة الله وبركاته

كيف حالكم يــ اعضاء وعضوات منتدانا الغالي ,,اتمنى ان تكونو كلكم في صحة جيدة

عارف اني مقصر معاكم ,,المنتدى في بالي وكنت نبي نكتبلكم رحلتي من اول يوم وصلت فيه لكن هذا هو ,, الوقت هنا يفوت بسرعة أو لانى مش منظم وقتي لاني من الجامعة الي السكن والعكس ومع ذلك نلقي في روحي مش ملحق على واجباتي وكل مانفتح المنتدى نتصفحه شوية وعلى اساس بندير رد لكن نلقي روحي غطست في الواجبات ,, " واحد مكبر الموضوع *_* "

الجماعة اللي ماشيين مع عائلاتهم صحة عليهم لانهم متريحين اكثر من العزاب ,,ربي يهنيهم ...

بما ان اليوم نهاية الاسبوع فعندي شوي وقت درت فيه مكرونة وعبيتها والحمد لله وتوة جهاز لكتابة تفاصيل رحلتي

طبعاً لا أنسى ان اشكر كل شخص سأل عليا ,, وطبعاً اشكر أختى أمة الله ونقولك بارك الله فيك على السؤال وان شاء الله تتوفقي في مبتغاك .

_________________  

رحلتي كانت الساعة 4 العصر وكانت على الخطوط البريطانية







الغدي كان مكرونة وكانت جدا لذيذة ^_^ لانهم واخذينها من ليبيا ,, ووصلت حوالي الساعة 6 للندن بتوقيت المدينة ,, الاجراءات كانت سهلة , الطمار كبير نوعاً ما لكن انى شديتها وراء الركاب اللي كانو معاي في الطايرة لين لقيت روحي برا ,, طبعا ماكنتش عندي فيزا دخول لبريطانيا لكن كان عندي حجز ليلة لفندق وعطوني تاشيرة دخول لمدة 24 ساعة ,, بعد ماطلعت من المطار مشيت للفندق وكان مريح , تعشيت ورقدت وتاني يوم الصبح نزلت فطرت طبعا الحجز كان مع فطور ,, كان في بوفي مفتوح ومنتوع جداً فطرت وانطلقت للمطار ..

فندق الهوليدي ان










رحلتي كانت الساعة 12 الظهر بتوقيت لندن ,, الرحلة مدتها 9 ساعات وكانت نوعا ما مريحة جابولي وجبة رز ومعاها كيكة طرف وزبدة وخبزة وممكن في حاجة تانية معاش نذكر ,, بما ان الرحلة كانت طويلة لكن ماجعتش كليت الكيكة فقط وبعدها جابولنا ساندويشات ,خذيت واحد بالجبنة .
طبعا الرحلة كانت فيها شوية مطبات هوائية لكن كيف ماقال خوي alous2030 في وسائل ترفيه وتقدر تتفرج على كورة ولا افلام او اى شي ينسيك طول الرحلة .

مطار "او هير" في شيكاغو




وصلنا لمطار " أو هير " في شيكاغو الساعة 2 ونص العشية والاجراءات كانت سهلة وسريعة ,في الحقيقة كانت اسهل مما توقعت عبيت نموذجين واحد في الطايرة والاخر اول ماوصلت للمطار وفي نموذج ثالث عبيته لما رفعني ظابط معاه بما انى اول مرة نجي لامريكا , طبعا دير روحك ماتعرف شي مش مايكسرولكش الراس ,, الاجراءات كلها خذت حوالي النصف ساعة وبعدها توجهت لمبنى اخر ومنه لرحلتي الاخيرة الي نيويورك , مطار شيكاغو كبير ولازم ماتنتبهو لــ لوحات بتاع الارشادات وديما اسالو موضفى المطار حتى لو كنتم عارفين الوجهة الصح ..

وهاذي كانت رحلتي , ان شاء الله مانكونش نسيت شي ولو اذكرت شي تو نذكره مرة تانية

هني الامور كانت الحمد لله معقولة والليبين اللي هني بارك الله فيهم ماسيبونيش بكل وكانهم يعرفوني من قبل يوصلو فيا للتسوق بسياراتهم وساعدوني في الحصول على السكن ,, بارك الله فيهم


ان شاء الله رحلاتكم تكون اسهل من رحلتي والامور راهو تمشي كويس غير نسقو الحجز من ليبيا وانى ماندمتش على اى شي جبته معاي من ليبيا سواء براد الشاهي او بكرج القهوة او حتى الحشيشة و البن والزميطة طبعاً ,, صح الوزن كان فوق المسموح بيه ودفعت فلوس لكن الحمد لله الاشياء اللي جبتها كلها كان ضرورية وحتى القرطاسية والمذكرات لو تقدرو تجيبوهن جيبوهن معاكم لان القرطاسية اغلى هني حسب ماشفت والاشياء الاخرى تقدرو تاخذوها من هني زي طاقم كامل فيه طناجر ومقلاء ,, عدد 7 قطع اقل من 30 دولار وطاقم اخر فيه صحون وطواسي وفترش اخر حتى هو ممكن في نفس السعر طبعاً ارخص بهلبة من ان تشرو كل حاجة على حدة والخلاط الكهربائي في 15 دولار ,, ولو تحصلو وصلة الكهرباء من ليبيا راح يكون احسن لانى ماحصلتهاش في ليبيا وشريتها لكمبيوتري من هني بــ 10 دولار .


طبعا الجو صقع ودرجة الحرارة ناقص 3 اليوم

بارك الله فيكم وربي يحفظكم