الفوضى في ادارة البعتاث

سبحان الله

والله نفس مشكلتي واكثر انا من طبرق مقدم على دعم مالي من اجل قبول من بدايه شهر 12 والله الي الان لم استلمها وقالولي جت من طرابلس ووجدو فيها غلط ومن ثم رجعت الي طرابلس لتعديل وبعد شهر ين ونص قالو الورقه راحت فى الطريق يعني لازم تقدم من جديد
وترجا 3 شهور اخري
هذا كله نفكر نمشي لطرابلس خايف نشحور فى فنادق ونلطع من طرابلس عالابيض..،.

السلام عليكم
والله نفس مشكلتي انا من غريان الحق انالمندوب قام بعمله لكن الفوض في ادارة البعتاتبالله ورقة دعم التاشيرة له شهر مازال غير جاهزة ردنا في الغرياني

السلام عليكم؛ اخوتي الكرام كلامكم يدل على أن المشكل الحقيقي في ليبيا سببه ومرجعه الادارة والتي يديرها ما يسمى بالمدير! إدهب إلى أي إدارة كانت في ربوع ليبيا وسجل عندك متى ياتي الافندم إلى مكتبه! لا أظن أن مديراً يبدا دوامه قبل العاشرة (هذا في أحسن الأحوال)؛ ثم حاول الدخول عليه عبر الأسلاك الشائكة والدهاليز وكمشة السكرتيرات المتخصصات في التطفيش والتوزيع! ثم انظر هل يخرج سيادته من برجه العاجي ويتفقد الموظفين من منهم في مكتبه ومن منهم خرج قبل الدوام! أنا يا أخي الكريم ذهبت كذلك إلى إدارة البعثات فوجدتها إدارة الفوضات؛ ناس مزدحمة عند الشبابيك ذكرتني بمطاعم المدارس أيام زمان؛ ثم عندما تريد ورقة ما لابد أن تسير عبر جل المكاتب حتى تجد ضالتك هذا إن كنت محظوظا، العبد لله كان يريد ورقة معينة واتيت لاجلها من بنغازي وشرحت ظرفي لمشرف الساحة الذي كان متعاطفا معي ولكنه أخبرني أن حضرة المدير لا يوقع على الأوراق مباشرة من الموظفين ولكن لابد أن تاتيه من البريد! أي أن المشرف الذي مكتبه على بعد خطوات من مكتب المدير لا يستطيع الدخول عليه بورقة تحتاج توقيعا وانما لابد من أن يضعها في صندوق البريد الصادر! هذا ما تكرم به علينا السيد المدير الجديد من إجراءات تزيد من نكد الليبيين ونصبهم! وهنا سؤال أوجهه إلى السيد الوزير نعيم على أي أساس تختار مديري الادارات؟ نزاهتهم وحدها لا تكفي وحصولهم على ورقة مكتوب عليها دكتوراة أيضا لا يكفي؛ لا بد من توافر شرط مهم جدا وهو الكفاءة الادارية من ضبط وحزم إدارة حاجات الناس بيسر وسلاسة! نداء أخير اوجهه إلى مديري الادارات أن اتقوا الله فينا واعلموا أنه انيطت بكم مسؤولية عظيمة سيسألكم الله عنها! ومن كان لا يجد في نفسه الكفاءة (خصوصا الادارية) فليعف نفسه منها وليتركها لمن هو كفؤ لها؛ والله الموفق

خوي محمد المسماري كيف يعني راحت في الطريق ؟؟؟؟ من المسؤول ؟؟

المفروض أن ورقة الدعم المالي لاتأخد حتى اسبوع ؟؟ كيف هكي شهرين يضيعن

حق ربي هذا مزاط بعينه....واالله جابولنا الضغط والسكر والزهايمر
معقوله الشحوره هذي....هذي معيشه سوده...عليك مرطزه ودره كبد..

اتركوا الليبين وشأنهم.....
ذكرتني بشحورتي بين ادارة البعثات في الحميضه وبين الجامعه...
ياريت بس تردوا لمقالتي بعنوان(مقهههههوووره بكل بكل بكل)...
مليانه دمووووع ومآسي ومواقف كلها عبر!!!!

انا والدي شويه ويتبري مني غير متحشم فيها...
والله اهلي قالولي فكينا منها المشيه السوده هذي
هذا غير في بلادنا متشحورين!!!!!معناها بره شن يبي يسير!!!!!

اللي مش قد المسؤليه يرفع ايده ويتنحي!!!!!

رااااااااااااهووووووووووا ..........هررررررررررررمناااااااااااااااا!!!!!!

civilengineeribrahim كتب:خوي محمد المسماري كيف يعني راحت في الطريق ؟؟؟؟ من المسؤول ؟؟

المفروض أن ورقة الدعم المالي لاتأخد حتى اسبوع ؟؟ كيف هكي شهرين يضيعن

والله ليا ثلاث شهور نرجا ...

السلام عليكم
صحيت و الله موضوعك رائع جدا وانا انتطار فى دعم بس انا توا خائفة لانى معتمدى على مندوب خاص بعمل لانى ماعند احد يطلع معى علشن يعدى لطرابلس من اجل الاوراقى لذلك معتمدى على مندوب و تمنى ربى يحل موضوع هض و الله انا كانت فى مشكلة انى منعرفش شئ فى موضع الافاد بس عن طريق منتدى استطع تكملى الاوراق من خلال مشاركاتكم فمثلا نماذج مهم جدا واجدته عند الاخ رائع خير وايضا النصائح و بصرحة موضوع رائع رائع و اتمنى ان تحل هذه مشكلة و مشكور على مجهود حلو و اله خللكم لو عرفت اىشئ قولوا تحياتى

السلام عليكم
يا جماعة بجون اي مجاملة الكلام هذا مش مزبوط انا درت الاجراء هذا في اقل من يومين