أمثال ليبية

الحطاب كتب:


السكوتي تحته كوتي:
وهي تعني ان الشخص الي دائما ساكت هو الشخص عنده بلاوي
كل قصة تحتها غصة :
وتعني نفس المثل الاول
ماقالوا طق الاماحق:
تعني ان الشي الذي يقال يكون صحيح
الربيع من فم الحوش يبان :
معناها الشخص الكويس والباهي يكون معروف
ياحوش اهلي ماعليك غنوة
تعني بيت الاهل لاغنى عنه
جعنك يامادي بين جاي وغادي:
وتعني ان الشخص الي يمشي نفس المكان ويرجعله
كل فقعة بترفاسة:
وتعني مش كل شي تتمنيه تناليه وتلقيه في وقتها
كوكو نصه معلق:
وتهني شي يبدا قليل والكل يريده
اتحارفوا اتعارفوا
وتعني الناس عندما تتخاصم ويصير بينهم سوء تفاهم يعرفوا بعضهم على حقيقتهم
بعدالعشرة تبان الناس
وتعني ان عندما تعاشر الشخص تعرفه اكتر
ياشاقي بهم الناس همك من شاقي بيه
وتعني ان الشخص يتدخل في امور الناس وهي لاتعنيه
حامي يزعط:
يعني الشخص يكون في عجلة في امره
ياخسارة ماغننا طلعت العروس شينة:
معناها انه الشخص يكون تعب في شي وبذل مجهود في شي نهايته كانت مافيش شي
الجنازة كبيرة والميت فأر:
معناها لما الشخص يكبر المشاكل على شي مافيش
ملحقيش العنقود قال قارص:
وتعني ان الشخص عندما لايحصل على شي يعيبه
يحاسبوه البيت على اربعة طلع عش على عمود:
وهي تعني الناس المغرورة اللي تتفاخر بشي وانه بيت على اربعة وفي الاخر طلع عش على عمود
البنت لي عمتها لو جابت من كعبتها:
معناها ان البنت ضروري بتطلع تشبه لي عمتها ولو في شي بسيط
اللي بيحداي يحداي الغرف المطابخ يغنجوا:
تعني ان الشخص يصاحب الناس الكويسة وهي الغرف وهي حاجة عالية لكن المطابخ تكتر فيها الدهون والسواد بتاع الطنجرة
مايحك جلدك زي ظفرك:
وتعني ان مافيش حد يحس بحاجتك غير نفسك تحس بيك
كل وقت ولي اذانه:
وتعني كل حاجة تجي في وقتها
لانبيك لانصبر عليك لانخلي رحمة ربي تجيك:
وتعني ان الشخص لايبيك ومايصبريش عليك ولايخللك في حالك
زي المعيز كان تقاربوا يطنطحوا وكان تباعدوا يتصاحبوا:
وتعني ان الاشخاص لما يتقربوا يتخاصموا ولما يتباعدوا يزيد الغلا بينهم
ماتعجب يا عجيب لين تشبح وتجيب:
وتعني ان الشخص لايعلق علا احد الي ان يشوف حاجته
عمرك عمر دجاجة بيضاء:
معناها ان الشخص مهما يفعل ميعرفيش شي
شكارات العروس امها وخالتها وعشرة من قبيلتها :
وتعني ان البنت تشكرها امها وعيلتها
شكار روحه يكعد بروحه:
وتعني ان الشخص الي يشكر في نفسه هلبة يكعد بروحه
بعد شبع قال صامت:
معناها ان الشخص مهما ياكل في الاخير مايعجبه
برد الصيف احر من السيف :
وتعني ان برد الصيف احسن من برد الشتاء
اذكر القط يجيك ينط:
معناها لما تتحدت علا شخص تلقاه قدامك
علاقيس غطاءك مد رجليك:
وتعني ان الشخص علا حسب قدرته معناها لايسوي شي مايقدريش عليه
مايديرش صنعتين كان الكلب ينبح ويهز ذيله:
معناها ان الشخص ميقدريش ان يسوي حاجتين في نفس الوقت
من زبيبه يسكر:
وتعني ان الشخص من ابسط شي يزعل ويحمق
صنعة لي ماعنده صنعة:
وتعني ان الشخص يسوي في نفس الشي كل مرة
فاضية ومرتاحة البال:
وتعني ان الشخص يكون مشغول ويجيله شخص ويكلمه في مواضيع مش في وقتها
القفة تعزر الميدونة:
وتعني ان يكون الاشخاص من نفس الشي او يكون عنده الاشخاص نفس الاخطاء ويكعدوا يحذفوا في بعضهم بالكلام
كل شاه معلقة مع رقيبتها:
معناها كل شخص مسئول عن نفسه امام نفسه
الدواة هلبة والثمرة مهناش:
وتعني ان الشخص يتكلم هلبة وينصح هلبة في مواضيع وميفعليش شي
اللي يكرهك يحلم بيك الحلمة الشينة:
وتعني ان الشخص اللي مايحبيكش يجيبلك الاخبار السيئة
الجمل رافع والقراد ينين:
تعني الجمل يتحمل الثقل والقراد يقول هلبة
مااحرف من التومة كان الكراث:
وتعني ان مااحرف من حاجة مش كويسة الي حاجة اخرى مش كويسة
عمية وشدت خانب:
وتعني ان الشخص ان يفعل شي ودائما يفعل فيه ويقول عليه نفسه
كل يد تمسح على وجها:
كل واحد مسئول على نفسه
ايد بروحها متصفيقيش:
وتعني ان الشخص ميقديرش يسوي شي بدون مجموعة
ضحك الجمل في عمره نهار انشق شاربه:
وتعني ان الشخص يفعل شي ودائما يتكلم عليه
لقيتك يا بايرة واشتدتي:
وتعني اني نطلب شي من شخص يسويها وانا نفسي منقوميش بيه
صاحب العلة ينخصوه مرافقه:
تعني ان الشخص يسوي شي ويخبيه وبعدها يفضح روحها بنفسه
كل خانب شكاك:
كل واحد يسوي في حاجة يبقى يشك في الناس انهم يسوا فيها
الباب الي يجي منه الريح سده واستريح:
وتعني ان الشي اللي تجي منها مشاكل سدها واتركها واستريح
قالاشنو ودك يالاعمى قالهم قفة من عيون:
وتعني ان الشخص اللي يطلب حاجات هلبة ومستحيلة











الحطاااب يحييكم

مشاءالله عليك ياخوى الحطاااب وينك غياب لك مدة...؟؟؟

الحطاب كتب:النت مدايرها فيا قريب 4 ايام شكرا على السؤال

الحطاااب يحييكم

@BESSO كتب:مشكورین ابدعتو





بس فی مثل مفهمتش شن معناه

شن حالك?? حال الكرموس فی الغراره

شن معناها وشن هو حال الكرموس فی الغراره وشن هی الغراره

@محب ليبيا كتب:انا عندي مثل يرد عليهم وهو:


اقلب الطنجرة على فمها تطلع البنت لامها
وهذا المثل هو الاكثر تداولا