القصد من المنتدى

بعد التحية :
ارجو من الطلبة ان يشاركو بمشاركات تفيد الطلبة ومن في طريقه للسفر بدلا من الموضوعات الخاصه حت تعم الفايده
والله يوفق الجميع

أنا معك خوي في المقترح وإنت محق 100% .
هو صح المفروض تكون في وسائل و مواضيع ومقترحات لترفيه عن النفس لأنى من تجربتي لما نتضايق يكون هو الحل.
بس مش المعنى تكون أكتر من الحد المعقول
مع تحياتي

اخي معاك حق بس نحنا نحتاجو مرة مرة نفرفشوا شوي خاصة واننا في غربة والمواضيع الخاصة مش واجدة اغلب مواضيع المنتدى تهم كل الموفدين وكيف ماقالت اختي JOURI
نحنا نعتبروا المنتدى اسرتنا الثانية الي تخفف عنا مرارة الغربة

بصراحة المنتدى معاش بدى زى قبل يعنى كان الهدف منه الفائدة واعطاء المعلومة كبيرة او صغيرة على كل مايتعلق بالايفاد وانى نطالب مدير المنتدى والاعضاء المشرفون بالغاء اى موضوع مايكونش مهم وينشر الفائدة يعنى فى الاخر انجوا انهينوا فى بعض الورأة والرجل الليبيى احنى ارقى من هكى وتفكيرنا اعمق من هكى
مع احترامى وتقديرى لبعض الاعضاء يلى كان همهم الوحيد المساعدة

الف شكر ليكم :
بس من المفروض يكوف في قسم للفرفشه يكون احسن الي مضايق يخش ويضحك

انتم فهمتوا القصد بالغلط
ليش ماكانش فيه اعتراض على النكت وكل واحد كتب مشاركته وكلنا اتسلينا لكن تضحك وتستهزأ بالمرأة الليبية فهذا امر مرفوض كليا توصل بيكم الدرجة الى الاهانة اظنى هذا مش مستواكم ابدا

لااضن المقصودالمرأه الليبيه ولااي امرأه فالنساء اخواتنا وبناتنا وقبل كل شيء امهاتنا

والله فكرة

انا وحدة من الناس اضطريت نشترك في مواقع طلاب غير ليبيين بيش نستفسر ونسئل وقديش فرحت يوم حصلت موقع خاص بالموفدين

وانا مستعده لاي سؤال يخص اخواتي المغتربات غير اسئلو بس
وحتى احني نستفيدو

انا مع الاخت سوما
كما اني اتمني من الاخ الي قدم مواضيعه الي عامل نفسه يفرفش بها علي روحه وعلينا ان يقوم بتعديلها او حتي ألغائها و ان يعتدر من اخته وبنته وزوجته و امه الي رباته وكبراته وخلاته يعرف بفتح النت ويكتب عليها مواضيع ترفع راسها وتخليها تقول صحيت ياولدي بارك الله فيك الي كبرت قدري , درتني مخلوق غريب( يعني كان مش امرأة شن بنكون؟؟؟؟ يمكن مخلوق غريب) و ان يعتدر من كل امرأة ليبيا
علا وعسي يعفوا عنه . انا شخصيا مش حعفوا عنه.
معليشي انا كذلك ألوم علي ادارة المنتدي الي تسمح بهيكي مواضيع مع علمي انها حريصة جد علي انتقاء المواضبع وانا شخصيا تم رفض بعض مواضبعي بس يمكن لانها يها اهانة لناس ثانية مش المرأة الليبيا

عدل سابقا من قبل حلا مقتدي في الأحد 18 يوليو 2010, 11:43 pm عدل 1 مرات

غهمونا شنو صاير؟؟؟
منو الي تهزا ع الليبية؟
مااعتقد بالك الراجل يبصر وخلاص
حد يتهزا علي روحه؟؟؟؟

حلا مقتدي كتب:

معليشي انا كذلك ألوم علي ادارة المنتدي الي تسمح بهيكي مواضيع مع علمي انها حريصة جد علي انتقاء المواضبع وانا شخصيا تم رفض بعض مواضبعي بس يمكن لانها يها اهانة لناس ثانية مش المرأة الليبيا

السلام عليكم ورحمة الله وبركاتة
أختي حلا شكرا تتبعك الدائم وملاحظاتك
لكن وجب التنويه

الموضوع كان عباره عن مزحة لا أكثر ولا اقل وهو مجرد نقل من أحد الأعضاء من أحد المواقع الأخرى وهو لا يهين الليبية و لا الليبيين ونحن لا نرضى لأمهاتنا واخواتنا الليبيات الإهانة
وأعتقد ان الموضوع ينتقد تصرفات وهيئة الرجل أكثر من المرأة لو تركزي فيه أكثر

و أخواتنا العضوات قبل ما تعلقي على ذلك الموضوع تعاملن مع الموضوع على انه مزحة وضحكنا وضحكوا وهذا ما اراه ربما أكون على خطأ ولهذا

أقترح عليك اكتبني موضوع واطلبي من كل من يرى ان في الموضوع اهانة يصوت ونشوفوا راي الأعضاء وهكذا تحل المشكلة

ونحن لا نتمنى زعل العضوات من المنتدى بصراحة لان بدونهن المنتدى مثل ليبيا بدون ليبيات

عدل سابقا من قبل مدير المنتدى في الإثنين 19 يوليو 2010, 2:17 pm عدل 1 مرات

السلام عليكم :
المشكلة أن الموقع أصبح منتدي أدبي بدرجة كبيرة والمشكلة الاكبر أن بعض الاعضاء يسعون إلي زيادة عدد مشاركاتهم بأي شكل من الأشكال والشئ الأخر أن معظم المشاركات منقولة من منتديات أخري دون الأشارة إلي ذلك يعني نسخ ولصق وهذا في حد ذاته مخالف ..أرجو التركيز أكثر علي التفاصيل التي قد تغيب علينا نحن الموفدين الجدد فالمنتديات الخليجية علي سبيل المثال لاتخلو من النصائح والشروحات عن الدراسة بالخارج من لحظة صدور قرار الإيفاد حتي الوصول إلي الدولة الموفد إليها والتي للأسف وجدنا فيها ضالتنا المنشودة ..

Donna33 كتب:

السلام عليكم :
المشكلة أن الموقع أصبح منتدي أدبي بدرجة كبيرة والمشكلة الاكبر أن بعض الاعضاء يسعون إلي زيادة عدد مشاركاتهم بأي شكل من الأشكال
اختي الكريمة اعتقد ان ذلك مسموح به وهناك مكان خاص في المنتدى (المنتدي الادبي)وجميعنا محتاجين له كمنفس من الضغط الذي نواجه في حياتنا اليومية ولاننسي ايضا المنتدي الاسلامي ولما له من فوائد وتذكير وعضات جزاء الله الخير لكل الاعضاء ومشكورين جميعهم
والشئ الأخر أن معظم المشاركات منقولة من منتديات أخري دون الأشارة إلي ذلك يعني نسخ ولصق وهذا في حد ذاته مخالف
اما من هذه الناحية فأعتقد ان الادارة دارت اللي عليها وهذا البند مذكور من ضمن قوانين المنتدي وبالتالي كل واحد وضميره
..أرجو التركيز أكثر علي التفاصيل التي قد تغيب علينا نحن الموفدين الجدد
اختي الكريمة اعتقد ان اغلب التساؤلات التي تهم الموفد الجديد قد تم الاجابة عنها من قبل الاعضاء فمشكورين جميعا وكل واحد عمل اللي يقدر عليه وفي حدود المعرفة
فالمنتديات الخليجية علي سبيل المثال لاتخلو من النصائح والشروحات عن الدراسة بالخارج من لحظة صدور قرار الإيفاد حتي الوصول إلي الدولة الموفد إليها والتي للأسف وجدنا فيها ضالتنا المنشودة ..

لا اعتقد اختي الكريمة بان هناك وجه مقارنة بيننا وبينهم لسبب معلوم لجميع بان الاعداد الهائلة من الطلبة في الخارج وايضا لعراقة منتدايتهم (قديمة جدا )
وبالتالي من الطبيعي ان تكون لديهم خبرات اكثر منا
والحمدلله بانا المنتديات الليبية باتت في الطليعة رغم حداثة عهدها
والحمدلله علي كل حال

ياالله يعني مالقيتوش علاش تنكتو وتضحكوا الا علي المرأة الليبية
وبعدين اي مزح تحكوا عليه و حضرة الاخ يعاود يرد علي احد الاخوات ويقوللها كوني امرأة يكون ليك رجل.؟؟؟؟؟؟؟؟؟؟؟؟؟؟ مداير روحه يقول في امتال مش في مزحة
انا لله وان اليه راجعون وحسبي الله ونعم الوكيل