حد يكتب في رسالته؟؟يجي يشاركني همومي

السلام عليكم اخواني واخواتي
بالله مافيش حد في مرحلة الماستر ويكتب في رسالته
اقل شي يشجعنا بصراحة مرعوبة ع الاخير ومن الارتباك كل يوم نقرا في كلمتين ونقعد نخمم صراحة صعبه..والي مصعبها انه عندي مادة وفيها امتحان وكورس وورك + رساله والاكواد الي مهبلتني ...ومش عارفه نرتب وقتي وين والا وين
في الامتحان الي قرب
والا في برمجة الواجب
والا في كتابة الرساله
والا اصلا في برامج الاكواد والتنفيد
ولتوا ماكتبت شي

حد يصبرني ويقولي انتو شنو احوالكم مع الرساله؟؟؟

انا شي منقطعه عن العالم حتى طلاب القسم فص ملح ودابوا وين متجندين مش عارفه ماتلقى من تسأل او يحمسك....

وبصراحة جامعه مانشستر هدي صعبه وندمت على دخولها بس ماباليد حيله اهو خلاص دخلنا ومعاش فيها....

يارب سهلها علي ...والله مرعوووووووووووووووبة شهر تسعه قرب
وكل شي يبوه قبل شهر تسعه زحمت علي...واني وين تزحم علي يستاك عقلي ونبطل نفكر

إن شاء الله ربي يسترها معاك يــ أختي

السلام عليكم
اختي العزيزة ماتخافيش اللي زيك كثير وهذا امر طبيعي انك تخافي وتبقي مرعوبة، بس الخوف سلاح ذو حدين اما ان يجعلك تعطي اكثر من جهدك او ان يكتف يديك ولا تجدي للقيد مخرجا، انا زيك باقيلي سنتين من مدة الايفاد والى الان لم اكتب حرف في الرسالة يعني فاتت سنة في بريطانيا وبعدها سنة تجميع مادة علمية واطلاع وقراية، وهذا مفروض الصح، الا ان ما رئيته جعلني اخاف، اكثر من صديق لي بدأنا مع بعض والان منهم من انجز نصف الاطروحة، فصرت اسأل نفسي ما الذي يحدث هل انا متأخر الى هذه الدرجة، والله اني في حيرة من امري، فما تعلمناه من طرق واسس للبحث تفرض سنة كاملة للاطلاع وتجميع المادة العلمية والقراءة المعمقة، وإن كان هذا صحيحاً فكيف انجزوا هذا القدر، يعني بالعامية"شئ ايخليك تعيط، يا ادير زيهم وتمشي، يا اتبع الصح وتطلع انت متأخر"

استعيني بالله او نظمي وقتك. او ابدي لان اللي يبدا معنها قريب ايكمل

اذكري الله و من يذكر الله يجغل له مخرجا. ربي معاك

شكرا ليكم اخواني وخواتي ع الدعم بس والله الي يده في نار مش زي الي يده في المية
يعني الكلام ساهل وانا نفسي نحدت روحي انه عادي وتمشي الامور وتتسهل اهم شي الصحه ...
بس خوفي من الفشل..والتاخر...
ربك يعينا...
اهو نسمعو منكم انو في حالات زيي واكتر

احكولي شنو برنامجكم في الكتابه او حتى الدراسه...

الشعور بالخوف والرعب والارتباك شي طبيعي كلنا تصير معانا وتوا انا كيفك امتحانات ونكتب في الرسالة والمشرفة مابتش تشوف شي قالت كملي اربع فصول وبعدها جيبيلي وانا قاعدة حايرة مش عارف هاللي نكتب فيه صح والا خطاء وفوق من هذا المواد طويلة وكلام متشابهة وانا ام لطفل عمره سنة وشهر وزوجة وعندي مسؤليات واااااجدة
ساعات نندم نقول ليش كملت مش كان اكتفيت بالماستر وخلاص لكن بعدها نقول لا اللي وصلو وخذو الدكتوراة ماهمش احسن مني اكيد حتى هم تعبوا ومافيش حاجة تجي بالساهل ولما نضايق نقرا القران ونذكر ربي ونحاول انظم وقتي (رغم ان الاطفال مافيش معاهم تنظيم وقت لانهم متقلبين حتى في نومهم )لكن في الاخير نقول انا نبذل كل جهدي واكيد ربي مايضيع تعبي
وان شاء الله حتى انتي ربي مايضيعش اتعبك وكيف ماقالوا
من يتهيب صعود الجبال يعيش ابد الدهر بين الحفر
ماتخليش الخوف يعجزك حاولي وحاولي وحاولي وحاولي لغاية ماتوصلي

توكلي علي الله ياختاه ومادام بديتي لا يمكن ترجعي للصفر ,,,كلنا بدءنا في كتاية رسائلنا فانا عندي مقترح في شهر 9 وهو المقترح التالت لهدا العالم والصراحه لم ابدء في كتابته بعد واقوم حاليا بتجميع الماده ومن تم علي الدهاب الي ليبيا لاخد البيانات من عينة الدراسه ... وهدا الامر اختي ليس بالامر الهين ايضا
نسال الله لي ولكي ولجميع احواننا واخواتنا بالنجاح

الله يكون في عون الجميع

شوفي الوصلة بالك تستفيدي منها
أضغطي هنا
ان شاء الله ربي يوفقك ويسهلك

تسلم قصص حلوة وتشجع الواحد
شكرا لك