دخول



ملتقى الطلاب الليبيين للدراسة في الخارج، اخر قرارات الإيفاد، التفويضات، إدارة البعثات

descriptionرحلتي الي  كندا Emptyرحلتي الي كندا

more_horiz
سوف اسرد عليكم رحلتي من ليبيا إلي كندا عسى أن أفيد من يريد السفر والقدوم لدراسة, أول خطوه بعد حصولي علي تذاكر السفر لي ولي زوجتي وابني الرضيع علي فئة البزنس والتي لا يوجد فرق بينها وبين الفئة السياحية ( من حيث السعر) كلمت المكتب الكندي قتلهم اني ارغب في تغيير دراسة اللغة من جامعة New Brunswick إلي معهد اللغة في لندن أونتاريو واسمه Culture works ونصحوني نصيحه لقيتها قدامي في المطار وهي اني واخذ التأشيرة علي جامعة New Brunswick قالو لي لو طلبوا منك القبول أعطيهم قبول ألي واخذ بيه التأشيرة .علي العموم انطلقت من مدينة الزاوية شور مطار طرابلس الدولي وكان كل شي عادي ما عدا التفتيش كان دقيق جدا .طبعا الوزن أعطوني الخطوط الإنجليزية 90 كيلوا علي كل تذكره والطفل 30(الحقيقة كان وزن حقائبي اقل بكثير ) الخدمات في الطائرة من طرابلس إلي لندن بريطانية كانت عاديه جدا والمقاعد ضيقه ولاكن كانت رحله قصيره 3:30 ,وصلنا مطار هيثرو وقبل الذهاب لختم الجوزات توجهنا إلي جماعة الخدمات وهم قبل ختم الجوزات و الخروج من المطار وقتلهم عندي ترانزيت إلي كندا فأخذوا مني التذاكر للتأكيد وأعطوني حجز فندقي لمدة ليله واحده ووجبة عشاء وفطور الصباح وتذاكر ذهاب وإياب للحافلة ,كانت الإقامة ممتازة في فندق الهيلتون ,في اليوم التالي توجهنا إلي المطار وكان التفتيش دقيق جدا ثم غادرنا عن طريق طائره ضخمه مريحه جدا واستغرقت الرحلة 7 ساعات للوصول إلي تورنتو .بعد تأخير حوالي الساعة وتعطيلي من قبل موظفة الهجرة فاتتني الرحلة الداخلية المتجه لندن أونتاريو فذهبت إلي الخطوط الإنجليزية وقلت لهم أن الطائرة تأخرت ساعة وفاتتني الرحلة فأعطوني حجز فندقي في المطار في فندق الشيرتون وحجزوا لي تذاكر علي اليوم التالي ,الصراحة زعلت لان عندي حجز فندقي في لندن أونتاريوا وكذلك حقائبي بدل ما نستلمها في لندن استلمتها في تورنتو وتبهدلت في نقلهم ولاكن قدر الله وما شاء فعل ,في اليوم التالي طارت بناء طائره تعمل بالمراوح ,فضلت لو اني ذهبت بتاكسي من تورنتو افضل من سفر 40 دقيقه علي متنها لانها كانت 40 دقيقه مرعبه بسبب الأمطار الغزيره والبرق وصوت المراوح المزعج جدا. رحلتي الي  كندا 548714
وصلنا لندن ومن المطار إلي الفندق الذي حجزته من ليبيا بي 180 دولار لليله (حرام فيه حتي 40 دينار) المهم لا اعرف احد في هذه المدينة فقررت الصباح التوجه إلي المسجد أول ما خرجت من الفندق قررت أن اسأل عن العنوان فسألت رجل جنتل كان مع زوجته عن العنوان فقالوا هذا مركز اسلامي وأصروا علي توصيلي بسيارتهم الفارهة علي الرغم اني ملتحي ومنظري لا يعجب الكثير من المسلمين (و الله كانت المفاجئة كبيره لان في ليبيا صاحب سيارة فخمه حتي خير مرات ما يقولك مش غير يوصلك) فأيقنت انه لا يندم من يستخير الله في امر ويسير علي ما اختاره الله له, في المسجد تعرفت علي شخص ليبي من مدينة بنغازي الله يفتح عليه ساعدني كثيرا ويمكن تلخيص الأشياء التي قمت بيها كتالي:
1-من الصعب أن تجد شقه جاهزه هنا في لندن, ولي اني وصلت في شهر 4 يعني نقدر نحصل علي شقه فقط في شهر 5 والشقة محتاجه انك تدفع شهرين من الإجار والعقد يحتاج ظمان من المكتب الكندي أو تعطيهم ورقة الدعم متع البعثات وقبول اللغة, ومدة العقد لا تقل عن سنه والشقة غير مفروشه يعني تحتاج 2500دولار اقل شيء لتشتري الأثاث الأساسي.
2-المكتب الكندي طبعا قالوا معندناش فلوس والفندق 180 دولار والشقة تجهز بعد شهر؟؟؟ بمساعدة أخينا أمين من بنغازي والأخوة الليبيين المقيميين حصلت علي شقه مفروشه 100 دولار اليوم .
3-فتحت حساب وبعثت الأوراق المطلوبة للمكتب الكندي في بنك اسمه TDbank وهذا ميزته في كل مكان موجود وركز لما تفتح حساب جيب لهم ورقه من المعهد متعك بيش يعطوك حساب طالب 30 سحبه ببلاش وبعد أل 30 يخصموا علي كل سحبه .
4- الشفره نصحوني الشباب علي شفره اسمهاwind فيها باقت 40 دولار في الشهر ممتازه ,المكالمات في كل كندا غير محدوده والأنترنت غير محدود والرسائل إلي ليبيا والعالم وداخل كندا غير محدودة ,لاكن فيها مشكله أن مش أي هاتف يمشي معها, أشريت منهم هاتف ب 300 دولار.
5-انا اسمي في التفويض رقم واحد الي اليوم لم يتم تفعيل ملفي في المكتب الكندي لأن الاموال لم تصل للمكتب وحسب كلام الزملاء في الوزاره انهم تحولوا الاسبوع الماضي للمصرف ليبيا silent .
إنشاء الله تستفيدوا من التجربة وما تنسونا من صالح دعائكم

descriptionرحلتي الي  كندا Emptyرد: رحلتي الي كندا

more_horiz
بارك الله فيك يا أخي أبويكر على هذا السرد الجميل .. و إنشاء الله نلحقك عن قريب .. وربي يوفقك ويسخرلك عباده الصالحين.

_______________________________

محمد بيزان

descriptionرحلتي الي  كندا Emptyرد: رحلتي الي كندا

more_horiz
السلام عليكم

حمدا لله على سلامتك
اخي ابوبكر

ويايت تقولنا شن هيا الاوراق المطلوبة اللي بعتتها للمكتب الكندي

وهل تبعت اي شي متعلق بفتح الحساب ولا لا؟

وبالنسبة لبرقية الصرف متع الخزانة ورسالة بداية الصرف وتعريف الطالب هل بعتتها بالايميل ولا بالفاكس ولا بريد

descriptionرحلتي الي  كندا Emptyرد: رحلتي الي كندا

more_horiz
I am in the school now i will write the answer when come back home.

descriptionرحلتي الي  كندا Emptyرد: رحلتي الي كندا

more_horiz


بارك الله فيك اخي الفاضل

بس انت لما طلبت خط الرحلة شنو كتبت يعني كتبت طرابلس _ اونتاريو (لندن ) ؟؟؟

علاش الشنط في تورونتو قعدوا معاك مش المفروض يمشوا دغري للندن؟

بالتوفيق

descriptionرحلتي الي  كندا Emptyرد: رحلتي الي كندا

more_horiz
بعتلك علي الخاص خوي...ارجو الرد

descriptionرحلتي الي  كندا Emptyرد: رحلتي الي كندا

more_horiz
أخي ابوبكر
حمدا لله عالسلامة متمنيا لك التوفيق
فقط أردت ان أسالك هل تنصح بالسفر على الخطوط البريطانية
هل الخطوط البريطانية تذهب إلى مونتريال
جزاك الله كل خير

descriptionرحلتي الي  كندا Emptyرد: رحلتي الي كندا

more_horiz
الف الحمدلله على سلامتك .. الله يعينك ان شاء الله وياريت تبشرنا اول ما يتعاملوا معاك المكتب الكندي

descriptionرحلتي الي  كندا Emptyرد: رحلتي الي كندا

more_horiz
nasser75 كتب:
أخي ابوبكر
حمدا لله عالسلامة متمنيا لك التوفيق
فقط أردت ان أسالك هل تنصح بالسفر على الخطوط البريطانية
هل الخطوط البريطانية تذهب إلى مونتريال
جزاك الله كل خير

انا اعجبتني الخطوط الانجليزيه جدا, بصراحه مريحه وخدماتهم ممتازه.

descriptionرحلتي الي  كندا Emptyرد: رحلتي الي كندا

more_horiz
Joy Libya كتب:


بارك الله فيك اخي الفاضل

بس انت لما طلبت خط الرحلة شنو كتبت يعني كتبت طرابلس _ اونتاريو (لندن ) ؟؟؟

علاش الشنط في تورونتو قعدوا معاك مش المفروض يمشوا دغري للندن؟

بالتوفيق

مش لازم حتي لو غلطة في الخط وكتبته غلط في البعثات ,انت بس إمشي للخطوط الانجليزية في برج طرابلس دور 19 إحجز مبدئ وارفع الحجز لشركة ألي تفويظ تذاكرك موجود بيها.
الحقائق شاحنهم من طرابلس طول الي لندن اونتاريوا وكل عملية ترنزيت يركبوا الحقائب معاي لاكن لما فاتتني الطائره حتي الحقائب خلوهم في تورنتو.

descriptionرحلتي الي  كندا Emptyرد: رحلتي الي كندا

more_horiz
ام مالك كتب:
السلام عليكم

حمدا لله على سلامتك
اخي ابوبكر

ويايت تقولنا شن هيا الاوراق المطلوبة اللي بعتتها للمكتب الكندي

وهل تبعت اي شي متعلق بفتح الحساب ولا لا؟

وبالنسبة لبرقية الصرف متع الخزانة ورسالة بداية الصرف وتعريف الطالب هل بعتتها بالايميل ولا بالفاكس ولا بريد

الاوراق المطلوبه :فقط البرقيه متع البعثات تبعثها بالايميل الي جمانه وتقولها وصلت وهي تبعثلك شنو المطلوب منك.وانت اول ماتوصل تقدر بورقة الدعم من اجل القبول وكذلك ورقة study permit رح يعطوهالك جماعة الهجره في المطار تفتح حساب وبعدين جمانه رح تطلبه منك

descriptionرحلتي الي  كندا Empty رحلتي الي كندا

more_horiz

5-انا اسمي في التفويض رقم واحد الي اليوم لم يتم تفعيل ملفي في المكتب الكندي لأن الاموال لم تصل للمكتب وحسب كلام الزملاء في الوزاره انهم تحولوا الاسبوع الماضي للمصرف ليبيا
مساء الخير
ممكن تقولي كيف قدمت ع المعهد وانت ملفك ماتفعلش في المكتب الكندي,انا قالي المكتب مش حنعطيك رسالة دعم للمعهد لان ملفك مش مفعل بمعنى مافيش داعي تسافري توه.

descriptionرحلتي الي  كندا Emptyرد: رحلتي الي كندا

more_horiz
albatool كتب:

5-انا اسمي في التفويض رقم واحد الي اليوم لم يتم تفعيل ملفي في المكتب الكندي لأن الاموال لم تصل للمكتب وحسب كلام الزملاء في الوزاره انهم تحولوا الاسبوع الماضي للمصرف ليبيا
مساء الخير
ممكن تقولي كيف قدمت ع المعهد وانت ملفك ماتفعلش في المكتب الكندي,انا قالي المكتب مش حنعطيك رسالة دعم للمعهد لان ملفك مش مفعل بمعنى مافيش داعي تسافري توه.

والله كل شي علي البركه حتي انا قالي المكتب الكندي نفس القصه والمكتب مراسل جميع المعاهد علي اساس ان فيه مشكله في السيوله.انا كلت المعهد وقالولي تعالى ودرت امتحان والحق مدوش معاي واعتقد انهم يعرفوا ان المشكله رح تنحل ولو بعد حين وإن شـاء الله ربي يسترنا وينزلوا الفلوس مع العلم اليوم بس كلمة المكتب الكندي بالهاتف وقالوا اسمي مزال مجاش من الوزاره وقالوا كلمتني الوزاره علي اساس رح تبعث قائمه جديده بدل برقيات بداية الصرف نتمنى متعطلش .

descriptionرحلتي الي  كندا Emptyرحلتي الي كندا

more_horiz
بارك الله فيك ياخوي و ربنا يسهلها عليك

descriptionرحلتي الي  كندا Emptyرد: رحلتي الي كندا

more_horiz
albatool كتب:
بارك الله فيك ياخوي و ربنا يسهلها عليك

وفيكم بارك الله

descriptionرحلتي الي  كندا Emptyرد: رحلتي الي كندا

more_horiz
انت في اي تقويض خوي ومن دفع ثمن التذكرة للخطوط الانكليزية...وايش علاقة وكالة الامازون بالامر اذا حجزت علي حسابك...

descriptionرحلتي الي  كندا Emptyرد: رحلتي الي كندا

more_horiz
السلام عليكم
حمدا لله على سلامتك
اني لما حجزت على الخطوط الانجليزية قالولي الفرق بين الدرجة العادية والبزنس 1200 دينار لهذا سافرت على السياحية
وبتت ليلة في المطار على حسابي
لوكن الحمد لله مشت الامور

descriptionرحلتي الي  كندا Emptyرد: رحلتي الي كندا

more_horiz
كم سعر الاقامة للشخص في فندق المطار......

descriptionرحلتي الي  كندا Emptyرد: رحلتي الي كندا

more_horiz
بارك الله في خوي على السرد الجميل
واستفاد من تجربة سفرك وجزاك الله خيرا
وانا نفس الشيء تفويض رقم واحد والمكتب الكندي لم يفعل ملفي ومتردد نسافر او لا
ونسال الله بمنه ان يجزيك عنا خيرا الجزاء نفع الله بك المسلمين

descriptionرحلتي الي  كندا Emptyرد: رحلتي الي كندا

more_horiz
abubaker.sasi كتب:
Joy Libya كتب:


بارك الله فيك اخي الفاضل

بس انت لما طلبت خط الرحلة شنو كتبت يعني كتبت طرابلس _ اونتاريو (لندن ) ؟؟؟

علاش الشنط في تورونتو قعدوا معاك مش المفروض يمشوا دغري للندن؟

بالتوفيق

مش لازم حتي لو غلطة في الخط وكتبته غلط في البعثات ,انت بس إمشي للخطوط الانجليزية في برج طرابلس دور 19 إحجز مبدئ وارفع الحجز لشركة ألي تفويظ تذاكرك موجود بيها.
الحقائق شاحنهم من طرابلس طول الي لندن اونتاريوا وكل عملية ترنزيت يركبوا الحقائب معاي لاكن لما فاتتني الطائره حتي الحقائب خلوهم في تورنتو.


اني اللي نعرفه لما تمشي تسافر و عندك ترانزيت الشنط المشحونة ما تشوفهمش بكل الا في المحطة الاخيرة

كيف تقول انهم في كل عملية ترانزيت ينزلوا معاك؟؟؟؟؟؟؟؟؟

descriptionرحلتي الي  كندا Emptyرد: رحلتي الي كندا

more_horiz
الله يفتحها عليك يا خوي وجزاك الله الف خير علي المعلومات.

_______________________________


إذا أخذ الله ما لم تتوقع ضياعه

فسوف يعطيك ما لم تتوقع تملَكله

ألم يقــــل


" فعسى أن تكرهوا شيئا ويجعل الله فيه خيراً كثيراً "
صلاحيات هذا المنتدى:
لاتستطيع الرد على المواضيع في هذا المنتدى