أرجو من الأخوة الأعضاء في المنتدى تفهم وضع ووظيفة المشرفين في المنتدى
لما واحد يسأل عن حاجة في المنتدى مش لازم المشرف هو اللي يرد عليك لأن الوظيفة الأساسية للمشرف هو العمل على تنظيم والإشراف (مراقبة) مواضيع المنتدى والرد بما يعرف في حدود استطاعته وفي حدود وقته ولذلك يجب أن نعلم أن المشرفين كيفهم كيفكم يا أخواني واخواتي يعني حتى هم طلبة وعندهم ظروف عائلية واجتماعية ودراسية وعملية وغيره والبعض في ليبيا كيف خونا Inception ماعنداش حتى خط نت وفيه اللي مازال حتى هو قاعد يكمل في إجراءات إيفاده وعنده مشاغل في العمل والبيت خاطي أنه حتى هو ماشي جاي عشان يتم إجراءاته ويجهز للسفر فما تتوقع لما تكتب سؤال أنه على طول يجاوبوا عليك في نفس الوقت أو حتى بعدها بيوم وبعدين ممكن المشرف أو العضو توة ماعنده إجابة ولكن قاعد يبحث عنها في مكان آخر وسأل حد آخر ومازال ماجاه الجواب. والمطلوب أيضا حتى باقي الأعضاء يشاركوا يعني أنت لما اشتركت في المنتدى وسألت واستفدت وخذيت حاجتك باهي خلي الناس الثانية يستفيدوا من خبرتك على الأقل ليش السلبية.
بالنسبة ليا كنت لما نبقى موجود على النت ندخل كل حوالي ساعة مرة على المنتدى ولكن وجدت أن هذا الأمر يستنزف في كثير من وقتي وبعض الأعضاء سامحهم الله لقوها سمحة لما تجاوبهم على سؤال يعطيك سؤال ثاني مرات حتى يكون مش مستعجل وفي نفس الوقت مايبيش يتعب روحه ويشوف المواضيع المثبتة ولا السابقة في المنتدى وبالتالي يتكل عليك ومرات يكتب سؤاله في المنتدى وفي نفس اللحظة يبعث بنفس السؤال للمشرف ومرات حتى أكثر من مشرف وهذا خطأ كبير وأنانية في نفس الوقت لأن زي ماقلنا حتى المشرف إنسان وعنده إلتزاماته يعني نحكي عن نفسي المنتدى خلاني نقصر حتى في دراستي وحق أسرتي عليا بل وحتى في ساعات نومي يعني الواحد يبي يقدم مساعدة لوجه الله مش معناها تستغلها أنت أو غيرك وتأخذ وقت المشرف كله ووقت حتى ناس ثانية في حاجة للمساعدة وهذا يعتبر سرقة مافيش فرق بينها وبين سرق مال عام أو خاص لأن الوقت يعني المال وهذا خلاني في اليومين الأخيرين ماندخل للمنتدى إلا في ساعات متأخرة تجنبا للاحراجات رغم أني لما ندخل نلقى صندوق الرسائل الخاصة ممتلئ ونقعد نجاوب ونخزن الرسائل في الكمبيوتر عشان نرجعلهم وقت الحاجة (وهذ بروحه ياخذ وقت طويل) وخلاني نرد ردود سريعة لأن ماعندي وقت نرد على كل واحد بالتفصيل وعلى سبيل المثال فيه بعض المواضيع مرات يقعد الواحد يوم كامل ويكتب فيهن ويحطهن ويثبتهن عشان يجي أي واحد ويشوفهن ومايسألش إلا في نقطة صغيرة ماعرفهاش أو مش مغطية في الموضوع ومع ذلك شبه يوميا يخشوا أعضاء جدد ويقولي مثلا أنا مش عارف شي ونبيكم تعطوني كل شئ على التأشيرة البريطانية باهي شوف بروحك قبل وأسال.
زيادة عن هذا لازم نرد على الإيميلات اللي يجني على إيميلي الشخصي لا ومش هكي وبس ومرات فيه ناس تتصل حتى على الهاتف في أوقات مرات مش مناسبة يعني مرة نذكر وحدة من الأخوات مانعرفها من قبل سامحها الله اتصلت بيا الساعة 7 الصبح ونوضتني من النوم عشان تسألني بس هل المرافق الأخ يحقله يمشي مع أخته أولا؟ وتوة وأنا مازلت نكتب في الكلام هذا ومازال ماحطيته في المنتدى (عشان ماتقولوا بالك شافك موجود في المنتدى) واحد دزلي رسالة على الهاتف تخيل الساعة 3:30 في الليل يسأل على موضوع ممكن يتأجل لعند الصبح على الأقل يعني الواحد شنو يقول.
يا شباب لازم الواحد يبذل مجهود ومايتكل على الغير يعني هذ المنتدى خدمي خيري تطوعي ومافيش حد راهو ياخذ في أي قرش أو أجر إلا من رب العالمين فما تبقوا أنانيين تخربوا علي غيركم والأعضاء اللي يدخلوا ويستفيدوا أكرر لازم ما تبقوا أنانيين وتستفيدوا وما تفيدوا يعني للأسف بعض الأعضاء ما يدخل للمنتدى إلا لما يبي يسأل وكان واحد سأله وإلا بعثله رسالة خاصة مايرد وفي بعض الأعضاء وصلت بيهم الدرجة انه لما كان محتاج يبعثلك مرات 10 إيميلات يوميا وواحد مرة ساعدته (وهذا مش جميل أو من) وحجزتله بيت رغم أنه كان فيه صعوبات لأن الوكالة طلبت أن لازم يجي حد يشوف البيت وبعد صعوبة حصلت حد عن طريق شخص آخر مشى وشاف البيت وساعدته حتى بعد الوصول ومع ذلك بعد أموره استقرت ما يرد حتى على إيميل تبعثه له أو يبعثلك معايدة في الأعياد. وتلقاه لما يبي أي حاجة يدخل المنتدى ويسأل باهي المنتدى هذا بيتنا كلنا لازم نهتموا بيه كلنا يعني كل واحد عند دور.
وعليه من اليوم أي واحد يكتب سؤال في المنتدى لازم أولاً يكتب في العنوان شئ يدل على الحاجة اللي يبي يسأل عنها ومايكتب عاجل أو مستعجل إلا للضرورة وممكن يستخدم الخيارات اللي جنب العنوان (يعني مهم أو عاجل أو حصري أو غيره)
وأرجو عدم مراسلة المشرفين إلا للضرورة الملحة وعدم كتابة أي رد أو عتاب في الموضوع أنه ماحد رد عليه (أو يبعث للمشرف على الخاص يبي رد على سؤاله) قبل 3 أيام وأي حد يبعث لأي من المشرفين بسؤال عام سبق وأن تم شرحه في المواضيع المثبتة (يعني زي ماقلنا يسأل عن كل شئ عن التأشيرة دون تحديد السؤال) فللمشرف حرية الإجابة عن سؤاله أو تجاهله؟ وممكن تتأخر الإجابة.
أؤكد أن من لديه سؤالا عاما أن يكتبه في المنتدى ولاؤيراسل المشرف إلا بالإسئلة التي فيها تفاصيل خصوصية لايمكن أن تنشر على العام أو إذا صاحب السؤال يستحيي أن بكتب سؤاله على العام ممكن أن يراسل أي مشرف ويطلب منه أن يكتب سؤاله في المنتدى دون إظهار السائل.
عدل سابقا من قبل Abu Mohamed في الأربعاء 02 نوفمبر 2016, 2:27 pm عدل 5 مرات
قل إنّ صلاتي ونسكي ومحياي ومماتي لله رب العالمين
شروط الكتابة في منتدى المملكة المتحدة وآيرلندا
https://www.almofad.com/t9385-topic
تنبيه هام لكل الأعضاء في المنتدى
https://www.almofad.com/t19008-topic#146383
مشروع خيري
https://www.almofad.com/t29454-topic
