الحصول على التأشيرة الكندية في ظرف 45 يوم بدون اجراء مقابلة

شكرا  وهذا الي صار في البداية بعتلهم رديت عليهم ايهم اسرع في الإجراءات,,فردو عليا
The processing time is the same for both paper and e-application.
 
Regards,
Visa section
فرديت عليهم عالحال هذا إلغو الأونلين على حسب إقتراحكم
ربي يسهلي ويسهل للجميع يارب
وإنشاء الله تطلعلي في أسرع وقت يارب

أخي الكريم شكرا على مجهوداتك ووفقك الله.
أخي سؤالي كيف تم التأكد من الأوراق الاصلية بدون حضور شخصي؟ وشكراً

السلام عليكم 
جزاك الله اخينا h87 
بس ممكن حد يوضحلنا كيف نفتحوا حساب CIC account ياريت ما حد يبخل علينا لو عنده معلومه 
وكل عام وانتوا بخير

أخي HM 1879
وعليكم السلام،
أولاً شكراً على ردودك وصبرك على أسئلتنا فجزاك الله عنا كل خير وسهل لك أمورك. ثانياً بالنسبة للتأكد من الأوراق الأصلية يتم التأكد منها في السفارة في موعد التقديم حيث يطلب منك تقديم صورة من الأوراق المطلوبة مع الاصل والذي يتم الاطلاع عليه والتأكد من أن النسخ المقدمة هي صورة طبق الأصل وبعد ذلك يتم إرجاع الأصل لتحتفظ به.
هذا ما تم إخباري به والله أعلم

السلام عليكم

بالنسبة لعقد الزواج المترجم هل يعتدوا بالاصل ام الصورة فقط !! بالنسبه لاجراءات التاشيره  الكنديه

السلام عليكم
الأخت ساجدة
بالنسبة لطريقة فتح حساب على موقع وزارة الهجرة والمواطنة اعددت شرحا بالصور عن كيفية ذلك ولكن للاسف لم استطع ادراجها هنا في المنتدي بسبب ان نظام الصفحة لا يقبل ادراج الصورة مباشرة من الكمبيوتر ولا بد من رفعها على موقع اخر وبعدين اخذها كرابط وهذا موضوع طويل
اذا واجهاتك اي اشكاليات او صعوبات تقدري تطرحي سؤالك وباذن الله نفيدك انا او احد الزملاء
   بالنسبة لعقد الزواج طبعا بديري سكان للاصل فقط وهذا هو المطلوب بدون اي تعقيدات اخرى وهذا احدى فوائد التقديم على التاشيرة اونلاين

اخي عبدو
بارك الله فيك على كلامك الطيب وتفضل في اي وقت
بالنسبة للاوراق الاصلية كل المطلوب من المقدم على التاشيرة هو سكان فقط وهذي احدى افضل ميزات التقديم اونلاين 
يعنى انت جهز اوراقك اصلية وخليها معاك احتياطا فقط
موفقين ان شاء الله

السلام عليكم
سؤال مهم مهم للاخ HM87
فتحت حساب في MyCIC ولله الحمد ...ومن ضمن الاسئله كتبت انه المرافق حتى هو بيقرا لكن لما جيت بنحمل الملفات upload طلبوا مني القبول للمرافق وانا الى الان لم احصل على قبول له ....هل بامكانيي اني نبعث  الاوراق من دون ورقة القبول ....ولا نغير نوع الفيزا ولا شنو الحل  <<< الله ايبارك فيكم 

ساجدة
بالنسبة للمرافق في حالة درتي انه بيقرا معناها لازم تديري ابلود للقبول متاعه والا السيستم مش راح يقبل الابليكيشن متاعك
في حالة تبي تغيري نوع الفيزا للمرافق وهكي الافضل حسب وجهة نظري ماعليك الا تديري حذف للابليكيشن اللي درتيه لانه يعتبر غير رسمي ولم يقدم بشكل رسمي
ويعتبر الابليكيشن تم تقديمه للسلطات  الا بعد دفع الرسوم والتوقيع الكترونيا عندها ماتقدريش تغيري لكن توا عادي 
بالتوفيق

@hm1897 كتب:

ساجدة
بالنسبة للمرافق في حالة درتي انه بيقرا معناها لازم تديري ابلود للقبول متاعه والا السيستم مش راح يقبل الابليكيشن متاعك
في حالة تبي تغيري نوع الفيزا للمرافق وهكي الافضل حسب وجهة نظري ماعليك الا تديري حذف للابليكيشن اللي درتيه لانه يعتبر غير رسمي ولم يقدم بشكل رسمي
ويعتبر الابليكيشن تم تقديمه للسلطات  الا بعد دفع الرسوم والتوقيع الكترونيا عندها ماتقدريش تغيري لكن توا عادي 
بالتوفيق

اهلا جوي وصحة فطوركم جميعا
بالنسبة لنوع فيزا المرافق,,,أعتقد انه اجتهاد مني فقط وماعنديش خلفية كبيرة على الموضوع لانه مامريتش بيه
أرى أنه من الأفضل للمرافق التقديم على فيزا زائر ومن ثم تجديدها بعد الوصول لكندا لانها أسهل نوعا ما من فيزا طالب أو اذن دراسة لانه يستلزم نفس اجراءات الطالب صاحب الابليكيشن الاصلي...وياريت لو في حد عنده فكرة اكثر يوضحلنا
زي ماقلت هذا اجتهاد مني ورأي حسب ماشفت من اجراءات الفيزا
والله الموفق ودعواتي لكم جميعا بالتوفيق

جزاكم الله خيرا
يا اخي Hm87 و Joy

السلام عليكم وشكرا على المعلومه 
سؤالي الثاني :
بالنسبه للصوره الشخصيه  هل  ضروري نفس المواصفات بالمللي والانش !! او المهم خلفيه بيضه والوجه والاكتاف باينات !

 
السؤال الثالث : كاتبين في الدفع بطريقة
American card or Via card or Master cared
يعني حتى الفيزا كارد من ضمن الموضوع !! فلماذا لاتقبل الفيزا كارد تبع التجااارة والتنميه

وشكراااااااااااااااااا واااااجد والله فدتونا وان شاء الله يارب ايصير منها :)i

ساجدة 
نسيت نقولك معلومة وهي لو ان المرافق زوجك معناها ان شاء الله مافيش مشكلة بكل وقدميله على فيزا زائرة بدون الدخول في تعقيدات اذن الدراسة وفيزا طالب وتجيدها يتم حسب تجديد اذن دراستك انتي يعني باذن الله مافيش مشكلة
بالنسبة للصور ايه لازم من المقاسات اللى طالبينها..انتي شن خاسرة اعطي المقاسات للمصور وهو في لحظات يجهزها على الكمبيوتر اهم حاجة ماديريش سكان للصورة...خلى المصور يجهزلك نسخة الكترونية حسب المقاسات ويعطيهالك في فلاش جاهزة
  بالنسبة للفيزا كارد مافهمتش علاش ماقبلوهاش...على فكرة انا قبلولي من الفيزا كارد متاع مصرف التجارة والتنمية في موقع وزارة الهجرة والمواطنة الخاصة بولاية كيبيك لما خلصت رسوم اذن دراسة خاص بالاقليم اونلاين وماكانش فيه مشكلة ابدا...لكن السيستم متاع سي اي سي مايقبلش الفيزا كارد الليبية للاسف

بارك الله فيك يا اخ HM87 على الردودو السريعه وربي يكتبلك بكل خطوة حسنه ويسهلها عليك زي ما سهلتها على  نااااس واجد

عفوا أختي ساجدة هذا واجب,,شكرا بارك الله فيك على دعائك وان شاء الله موفقة في اجراءاتك

السلام عليكم ورحمه الله وبركاته..

أخي محمد الف مبروك اول شي بمناسبه حصولك ع التاشيره الكندية وعقبالنا وجميع الي راغب يحصلها..
انا كملت كل شي في اجراءات تاشيرة اون لاين بس وقفت  في مرحله الدفع الرسوم 75 دولار كندي للتاشيره الزياره .. جربت بالفيزا والماستر كارد متا مصرف لامان ... بس ميش مقبوله زيما وضحتوا انتم .
ممكن حد يدلنا علي مكان او محل عنده الفيزا او الماستر متاع خارج ليبيا ... ؟

ارجو الافاده
شكرا

وعليكم السلام ورحمة الله 
شكرا محمد وان شاء الله العقبة ليك ولجميع الطلاب
بالنسبة للفيزا كارد للاسف هادي مشكلة معظم الطلاب..لكن في محل في منطقة الهضبة ( سيمافرو البطاطا ) نسيت اسمه المحل هو مركز كومبيوتر ويشرو بالفيزا كارد وتقريبا يخلصو عليك وياخدو في عمولة ممكن حاجة بسيطة عشرة دينار...باذن الله توا نسأل ونجيبلك اسم المحل
او الحل الاخر هو ان تسأل على حد عنده فيزا من برا

thank you for everything

you're welcome Osama

@hm1897 كتب:

وعليكم السلام ورحمة الله 
شكرا محمد وان شاء الله العقبة ليك ولجميع الطلاب
بالنسبة للفيزا كارد للاسف هادي مشكلة معظم الطلاب..لكن في محل في منطقة الهضبة ( سيمافرو البطاطا ) نسيت اسمه المحل هو مركز كومبيوتر ويشرو بالفيزا كارد وتقريبا يخلصو عليك وياخدو في عمولة ممكن حاجة بسيطة عشرة دينار...باذن الله توا نسأل ونجيبلك اسم المحل
او الحل الاخر هو ان تسأل على حد عنده فيزا من برا

 
شكرا للاهتمام يا اخي محمد ..
عندي شويه اسئله بخصوص التاشيرة .

1-اي سفارة انراسل في حاله التاخير ؟
2-بعد كم يوم نبدا في مراسله السفارة؟
3-ما نوع المستند الي انت رفعته معاك للسفارة لكي تستلم التاشيره ( هل هو ايمل او افادة )؟
4-هل ضروري حضور شخصي ام لا ؟

شكرا مره اخرى لي سعت صدرك واهتمامك

السلام عليكم ورحمه الله وبركاته

اسلام عليكم
محمد 13
1 - كيف يعني اي سفارة تراسل في حالة التأخير؟ 
اذا كنت تقصد لما تقدم اونلاين من تراسل باش تستفسر....نظام التقديم اونلاين ماعندكش كيف بتوصل فيهم بكل ...يعني لا ايميل ولا رقم تلفون فقط عليك ان تستنى لين هم يكلموك, ماعندكش حل اخر....ولو بتكلم السفارة باش تسأل على ابليكيشن انت قدمته اونلاين ننصحك انك تفوتها الفكرة لان ردهم واضح وهو ان ماليناش بيه علاقة التقديم اونلان

2 - ماتراسلش بكل ولا عندك اصلا كيف بتراسلهم...تستنى بس وه اكيد راح يكلموك حتى ولو تأخرو

3 - لما يتم معالجة طلبك يبعتولك رسالة ويبلغوك انك ترفع جوازك معاك للسفارة + الرسالة هادي باش يعطوك تأشيرتك 
4 - هو انت بتمشي لمرة واحدة فقط للسفارة باش تاخد تأشيرتك ومع ذلك تبي حد ينوب عليك؟  مانعرفش لكن اعتقد لازم
ولا يهمك وتفضل في اي وقت

@Mohamed13 كتب:

السلام عليكم ورحمه الله وبركاته..

أخي محمد الف مبروك اول شي بمناسبه حصولك ع التاشيره الكندية وعقبالنا وجميع الي راغب يحصلها..
انا كملت كل شي في اجراءات تاشيرة اون لاين بس وقفت  في مرحله الدفع الرسوم 75 دولار كندي للتاشيره الزياره .. جربت بالفيزا والماستر كارد متا مصرف لامان ... بس ميش مقبوله زيما وضحتوا انتم .
ممكن حد يدلنا علي مكان او محل عنده الفيزا او الماستر متاع خارج ليبيا ... ؟

ارجو الافاده
شكرا

 مصرف الامان...غوط الشعال...اسأل على فيزا متع انترنت...
ارفع معاك جواز سفرك وفلوسك...الاستلام فوري
بالتوفيق

لكن زيد تأكد...فيه ناس في الردود اللي قبلي يقولوا انه فيزا المصارف الليبية ما يقبلوش فيها..
may be because it is missing the "Billing of Address" .

انا جربتها في دفع رسوم القبول...تخدم 100%