السلام عليكم
reference letter تعنى رسالة تزكية، أو رسالة توصية، يتم الحصول عليها من الدكاترة أو الأساتذة اللى درسوك فى مراحل التعليم الجامعى المختلفة، يفضل أن يكونوا قد قامو بتدريسك فى مادة أو أكثر ولكن ليس بشرط، فرسالة تزكية حتى من دكتور أو أستاذ يعرفك ومش امدرسك تمشى، وفى الأخير بكل لو تعذر الإتصال مع دكاترتك حتى من زملائك فى العمل أو مديرك تمشى، بس يفضل أن تكون من شخص أكاديمى.
رسالة التزكية مهمة جدا عند التقديم على الفيزا وعند التقديم على القبول الجامعى، ففى كل الأحوال هى ضرورية.
للحصول عليها، تمشى للكلية اللى قارية فيها وتطلبى من 3 دكاترة أو أساتذة أن يعطوك رسائل تزكية بالصيغة امتاعتهم هم يعنى المفروض ما عندكش علاقة بصيغتها وتكون على ورق شعار الكلية وفيها اسم الدكتور وبيانات الاتصال به مثل ايميله وتلفونه، وموقعه بتوقيع الدكتور، تاخدى من كل دكتور على الاقل خمس نسخ من الرسالة، وحدة منهم تحتفظى بيها باش اديريلها سكان وتبعثيها مع أوراقيك للفيزا، والاربعة المتبقية اتحطى كل وحدة منهم فى ظرف امتاع فلوس وتسكرى عليه وتخلى الدكتور ايوقعلك عليه من الاعلى ومن الاسفل (منين ما ينفتح الظرف) وتخلى القسم امتاعك يختملك على الظرف بجانب توقيعة الدكتور، وهكذا مع بقية الرسائل من الدكاترة الباقيين، لأن هذه الرسائل اللى فى الاظرف اموصى عليها المكتب الكندى باش اتجيبيهم معاك لمل اتجى ان شاء الله لكندا.
ملاحظة: بعض الجامعات لاتعتد بهذه الرسائل، وانما تطلب من الطالب لما ايعبى الابلكيشن اون لاين انه يعطيهم اسماء الدكاترة (هما ايقولولهم references أو referees )، وايميلاتهم وهما يبعتولهم نماذج خاصة على روابط سرية ايعبوهم الدكاترة وايرجعوهلهم، لذلك لما تاخدى رسائل التزكية من دكاترتك اتقوليلهم ايحطولك فى الرسالة ايميل مؤسسة، يعنى مش ياهو والا جىميل والا هوتميل، يعنى لازم ايكون ايميلهم تبع الجامعة والا مؤسسة، (ان شاء الله حتى ltt ) لأن الجامعات ماتقبلش من الدكاترة فى رسائل التزكية إلا ايميل ايكون تبع مؤسسة، وتقولى للدكاترة بأنه حيوصلوهم على ايميلاتهم بعد فترة طلب من الجامعات اللى حتقدمى عليهم باش ياخدو الامر فى الحسبان.
أرجو أن أكون قد أفدتكم، وآىسف عل الإطالة لان الموضوع مهم!
ما ترجمة .reference letter