ننقولك حاجة ..افتح شنطتك الصغيرة والكبيرة وكل مرة حط فيها الاساسيات
والله نقول في حاجات متابهدلة فيهم وعانيت بالدات بالدات شوف :::
مش عندك شنطتين صغار لو غيرت علي البزنس وزنهم قريب في 90 كيلو الزوز متلا لو علي لانجليزية هدو نوع فيهم وحط الل يبتاحطه والشنطة الصغيرة اللي بتقيمها بوريدينق فوق معاك المفروض مايفتوش وزنها 13 كيلو تقريبا نسيت لاني ديما زايده كيلوت ونخلص عليهم المهم الشنطة الصيغرة اللي معاك حط فيها اللي تبيه معاك في الهوتيل متلا لو ترنزيتك لندن او اسطنبول لانه الباقي مش حينزلهوك في الغالب في الترانزيت خير ماتقعد باللي لابسه لتاني يوم ..ياعني ملابسك تغييراتك معجون سنونك فرشتك فوطة صغيره للوجه كريمة شعرك وشامبو صغير مع بلسمه وكريمة ايدين خير مايصيرلك تشقق ووشن ان شاء الله فازلين وماتقولش راجل مايحطش .. فازلين مافيها شيء
الكريمات اللي بتحطها ولا غسول الوجه مايفتوش مية ملم ..وكان عندك رايحة حتي هيا فايته مية ملم ماتحطهاش معاك فوق دسها في الشنطة اللي في المارجو راهو يقيموها منك عين تضحك عين تبكي ...
سحابة قالو فيه مطرات ..بخمسة جنيه خودها صغيرة وحطها في حاشية الشنطة وشخاشيرك حتي 5 شخاشير مش الصغار الخفاف اللي زي قلتهم .. نقولك حاجة احسن حاجة في الاجانب انهم بعديين علي الموضة ^_^ المهم تدفي ..وكان بتنسق بعد ما تدفي روحك دير اللي تبيه
قوانطي حتي وحيد وحتني لو كنت ما تلبسش فيه وماتحباش ارفعه خمسة دولار تستحقها في الف حاجة ان شا لله تشري بيها خبزة بدل قوانطي
الشنطة اللي بتشريها كتفين فيها النيلو لانها متعرضة انها تنبل ..ماتدورش اديداس ولا Nike @_@ خود عادية بعدين اتوسعت خود اللي تبيه
شبشب باش تدور بيه في الحوش زليزهم اكتر من الي مفرشينه راهو حطه في الشنطة الصغيرة ومعاها شياته ولا خلاص اللي بتخلص بيه
كان انت من محبي القهوة ارفع قهوتك نص كيلو يسدك الايام الاولي وقالو بسيسة ديرها بالزيت كول منها كل صبح تقول قاعد في حوشكم ^_^
اكتب الباوورد بتاع الايميل وغير الاسئلة اللي فيه فيه موضوع بتاع المهندس احمد لله يمسيه بالخير متكلم عليه شوفه في هين يف القسم
خيوط الشحن من توة حطهم في الشنطة وانساهم لانك وين تجي طالع مرات مبيته في الشحن وتنساه في البريزة وتطلع وتخليه حط واحد زايد عندك في الحوش ..
خش المكتبة خود منهم ملف اللي فيه هلبة بلاستيكات ينحطو فيه ورقة ... حي عليك كان ماشريتناش معنها خود وراقيك غادي يتناطرو وقعمز ستف فيه اوراقك بالورقة هني ورقة البعتات بتاع االقبول والتاشيرة وقبول المعهد وصور الجواز صور منه صور هلبة خير ماتبدا تصور وصور صور شخصية عدد 16 صورة وخزن واحدة منهم في فلاش وشهادة الميلاد والوضع العائلي وتزكيات اللي كنت تقرا فيهم مختومات بختم الاكادييمة ومسكرات حتي ولو في جامعات يراسلو في الدكاترة انت ديرهم علي الاحتياط مادامك انت هني وتقدر توفرهم الله اعلم تبتت علي نفيس لاكايديمة ولا تشوف واحدة تانية
سماعات التلفون ارفعهم
ارفع حصن صغير ..في اوقات البني ادم يتضايق وهدا شعور طبيعي بالاخص انه في غربة فاقرب شيء انه يتقرب لربي حتي تقرا دعاء وين تجي طالع ربي حينورلك فيه طريقك ويوقفلك ناس عمرك ما توقعت انك تتلاقي معاهم او يساعدوك
مترجم راك تنساه ...حتي المورد صغير بخمسة جنيه ..مهم مهم مهم
انصولات مرات من اللي يعافو ويوسوسو ارفع زوز انصولات تحطهم علي الفراش وغلاف مخدة .
ساعة يد حتي لو ما تحبش تلبسها ... باش تشوف بيها الوقت .. تفوت حدود البلاد يصبع للوقت تمن غير حني مش حاسيين بيه وماعنداش حاجة منظمة ^_^ وكلنا فخر ولله الحمد ^_^... وكان ساعتك مافيهاش بطارية اشريلها مش تقول لا مانعدلش عليها زي حالاتي @_@
كان عندك ام بي تري خير وخير ارفعه وحطله اللي بتحطه تقعد تسمع وين ماشي لمكان لمكان في باصهم تلقي غير سماعاتهم قريب حتي السواق يحط سماعات @_@
الكبوط لو مايدفيش ماترفعاش غير يثقل وخلاص
.
.
.
انا مقروصة من الف حاجة ..فلهدا مافيش كيف بتشيطلي ريقي ^_^ ..مازلت نفتش علي تورنتو ^_^ تفويضنا طلع ..خطرها علي التفويض استني لين يوصلولك الرسايل الاصلية بتاع ربع المرتب والتعريف الطالب ماتعباش حد يبعتهملك ولا تشحنهم بالشحن يعطل وخساير فلوس ..فاالاضمن يطلعولك وتوكل علي الله وسافر ^_^
_______________________________
إذا أخذ الله ما لم تتوقع ضياعه
فسوف يعطيك ما لم تتوقع تملَكله
ألم يقــــل
" فعسى أن تكرهوا شيئا ويجعل الله فيه خيراً كثيراً "
