مرافق الموفد,,,,حياة شخصين في الميزان

السلام عليكم
انا انشاء الله حنتزوج بنت عندها ايفادالي امريكا, وانا مهندس من قاريونس
قاللولي ان ضم المرافق لدراسة الماجستير علي حساب الدولة مضمون, لكن القبول من الجامعات الامريكية مش مضمون
خايف بعد الزواج ولما نمشو غادي وماحصلش قبول اني نظلم البنت,مش حنقدر نقعد من غير عمل او دراسة في امريكا
نسألكم النصيحة لان الموضوع مهم, ويعتمد علي حياة ومستقبل شخصين.

سؤالي
هل نسبة حصولي علي القبول نسبة كبيرة
عشان لو مش كبيرة ننسحب من موضوع الزواج احسن ما نظلم البنت

السلام عليكم ورحمة الله ياخي ولد بنغازي وعلي جميع اعضاء هدا المنتدي الطيب

اولا هي نصيحة اخ لاخوه ادا كنت تريد الزواج من اجل المصلحة فابتعد عن هدا واترك بنت الناس في حالها لان هدا النوع من الزواج لن ينجح ولن يستمر لانه مبني علي مصلحه ,, اما ادا اردت الزواج وعلي سنة الله ورسوله وان لا تبالي بما يحدث من حيت ادا ما تم قبولك او لم يتم في الساحة الامريكيه فأنا اول من يهنئك بهدا الزواج ,, ولا تبني مستقبلك ومستقبل بنت الناس من اجل مصلحتك الشخصيه ارجوك ,,,, وفقك الله (عليك بالاستخارة وسوف ترتاح كتيرا بعد ادائها ان شاء الله)

السلام عليكم. اسمحو لي. عمره ماكان الزواج مربوط بمصلحة. سامحوني علي هالكلمة لكن جيل اليوم مش عارف كيف يفكر. الغرض الاول من الزواج هو اطاعة الله ثم ايجاد السكينة و المودة و الرحمة. و نصيحتي ليك اذا كنت من الاول مفكر في زواج المصلحة فهو مشروع فاشل من قبل ليبدأ. الحياة الزوجية تنجح بنجاحك في التفكير في مصلحة الغير قبل نفسك و لما تفكر في نفسك ما تتعارضش مع الاسرة. و زي ما قال خوي كريم الاستخارة باب كبير ليه فضل حسن الاختيار بس ابعد عن التفكير في زواج المصلحة.

بارك الله فيكم اخواني...لكن اسمحولي,,,انتو طلعتوا عن الموضوع
انا مش في مسألة نقاش هل زواج المصلحة غلط او صح.
\مع ان الرسول عليه الصلاة والسلام قال_(تُنْكحُ الْمَرْأَةُ لأرْبَعٍ: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَربَتْ يَدَاكَ " مُتّفَقٌ عَلَيْهِ
اما الحب والسكينة والمودة فحتجي بعد الزواج انشتء الله..لاني رجل اخاف الله...وهذا عليش سألت
انا حنتزوج زواج تقليدي..يعني عن طريق الاهل..والبنت هذي فضلتها لان فيها ميزة عن غيرها اني حنقدر نكمل دراستي معاها
اظن مش عيب او حرام.....
المهم في سؤالي اني هل فيه نسبة ولو بسيطة اني مش حنحصل قبول في جامعات امريكا
افيدوني جزاكم الله الخير

ومن قالك ان ضم المرافق لدراسة الماجستير مضمون؟؟
على حسب علمي ان المرافق يجب ان تنطبق عليه لائحة الايفاد من حيث العمر والمعدل والتخصص. يعني مضمون ان شاء الله في حال ان اللائحة تنطبق عليك ومع ذلك الاجراءات تاخذ وقت طويل.

لا حول و لا قوة الا بالله.................صخفتني بنت الناس................بصراحه لو انت من الاول بديت حياتك علي ميزه زي هده امالا لما تروحو بتردها لماليها......لازم توقف معاها و تشججعها و تاخد بيدها تو هيا تخمم في القبولوووووووووووووووووووووووومتزيدهاش...هي تبي راجل تستند عليه مش يستنفع من وراها.......ربي يهديك و يصلح بالك صلي الاستخار و ما خاب من استخار

اخ الحسلوك والله من الاجابات قلت هذا حيرجع عن الخطبة شكرآ لانك اجبت عن سؤاله وما طلعتش برا الموضوع وحتى انا نضم صوتى لصوتك لانى نعرف اشخاص كثيريين رافقوا زوجاتهم وكملوا دراستهم .....استخير وتوكل على الله

السلام عليكم

اخي العزيز انا ارى ان موضوع زواجك موضوع شخصي واكبر من ان يطرح في منتدى بهذا الشكل.
اما بخصوص ان الضم مضمون انت في ليبيا وليس هناك اي مضمون ومنها يأتي الجديد اما القبول يعتمد على قدرتك وامكانياتك العلمية فهو ساهل جدا اذا كان مستواك العلمي ممتاز.

اما موضوع زواجك من عدمه اعتقد لا يطرح في منتدى وامام الملا بهذا الشكل من هنا بداية الخطأ كن واثق من نفسك واعمل ما تراه صحيح فانت مقبل على حياة ذات مسؤليات كبيرة

توكل على الله

ان شاء ربي يباركلك فيه الزواجه و اني نعتدر لو معرفتش نوصلك رأى كيف منبي...لكن الي نبي نقولهولك انك لو عزمت فتوكل لان وراك قراية فاتحه بش ادير بيها الاجراءات.....وبعدين البنيه هده اكيد فيها ميزات اخرى غير الافاد و منها العلم العلم العلم المرأة المتعلمه مرأه راقيه في افكارها متحضره في اسلوبها و متابعه لما هو جديد و مفيد زيد عليه انها انسانه منظمه و لو لم تكن كدلك لما و صلت لمكان مش اي حد يوصله......................ربي يوفقك

بارك الله فيكم يا شباب
ماتوقعتش الرد حيكون هجومي هكي
مش المفروض اني نبرر موقفي او ندافع عن نفسي لاني مقتنع باللي ندير فيه ومقتنع اني صح..وعمري ما حنظلم حد لان اعظم الذنوب هو ظلم انسان لانسان.
نحب نقوللكم ان البنت فيها جميع الصفات اللي يتمناها اي شاب, لكن انا شاب ونحب نطور نفسي ونستغل كل يوم في حياتي..وشغلي الحالي ووظيفتي كويسة ..ومستقبلي فيها الحمد لله ممتاز..
يعني مش استغلالي او نشوف في مصلحتي بس.....
ياريت تجاوبوني بكل صراحة..لاني مش مقتنع ببعض الاجابات الليقالت ان صعب نحصل ضم وقبول في الجامعات...

يا اخي لا هجوم ولا شيء موضوع الزواج موضوع حياة فلا يصح ان تربطه بموضوع دراستك وليس من الضروري ان تدرس اهم شيء انك مقتنع بما ستفعله ورأيي كان هو انه انت تعرف نفسك وامكانياتك ونيتك ايضا فلا يصح ان تستشير ناس لا تعرفهم توجه الى اصداقاءك واحبابك هم من لهم قلب عليك.

من الاخير الموضوع مش هنا مكانه ممكن تستشير هنا لتستفيد من تجربة سابقة في الدراسة عموما كان ماعجبكش الكلام وكان كبير عليك نقدر نسحبه ما فيش مشكلة

سلام

يا خويا والله ماعلي هكي نسأل
حياتي الشخصية بيني وبين الله
لكن عندي سؤال يا شباب ونبي الرد..........

انا عندي سؤال واحد بس
هل تعمل في اعمال خير؟

كيف يا خويا قصدك اعمال خير
؟؟؟؟؟؟؟؟؟؟؟

اذا كان انت عادة تعمل في اعمال الخير وتساعد في من يحتاجها
خليهم يرموك في البحر مش تحصل ضم او قبول توكل على الله وما تخمم بكل
خوذ راي خيك

ربي يبارك لك ويوفقك ويجعل منكم الدرية الصالحة والمتعلمة والأهم تكون الدرية واعية مش زي ............
ادا كان هذا الرجل طامع ومصلحي وزواجه فاشل! اذا
إلي يتزوج جميلة طامع في التمتع بيها ومصلحي وزواجه فاشل!.
ولي يتزوج من عائلة ثرية طامع في فلوسها وميراتها ومصلحي وزواجه فاشل!.
ولي يتزوج من عائلة دات جاه وسلطان طامع في جاههم ومصلحي وزواجه فاشل!.
ولي يتزوج من عائلة طيبة طامع في الهناء والمودة وتامحبة ومصلحي وزواجه فاشل!.
ولي يتزوج من عائلة متعلمة طامع في درية مستفيدة من عرقها ومصلحي وزواجه فاشل!.
ولي يتزوج من عائلة مجرمين طامع في مشاركتهم الجرائم وجني معهم مايجنون ومصلحي وزواجه فاشل!.
ولي يتزوج من عائلة فقيرة طامع في التمتع بحياة هادية مع زوجة قانعة سوى وجد دلك أو لم يجد ومصلحي وزواجه فاشل!.
كل من يتزوج فهو طامع في الإستقرار وفي حياة أفضل والأستمتاع إما في مالها أو جمالها أو دينها وخلقها فهم طماعين ومصلحيين وزواجهم جميعا فااااااااااااااااااااااااااشل!!!!!. أستغفر الله العظيم ولا حولى ولا قو إلا بالله
واذا كان هذا الرجل زواجه فاشل وكل من يتزوج موفدة زواجه فاشل والفارق في المستوى التعليمي سيؤدي الى الفشل ...هل باقي كل الأزواج مناسبين لبعضهم ولا يوجد فارق في المستوى التعليمي هذا اذا كان مهم . وهل كل فتاة تزوجت بعد الإفاد كانت ستتزوج أفضل ممن تزوجتة وسافرت معه؟؟؟؟ اذا كان هذا صحيح ادا لماذا لم تتزوج قبل الإيفاد مع أحترامي وتقديري لهم وسعادتي لفرصة زواج الطرفين في متل هذه الضروف الطيبة .والله الموفق لما فيه الخير.

شكرا اخي جرماي...فهمت قصدك..وانشاء الله ربي يوفقني
خوووويا عبد المعين....وسع باللك...كلامك كله انا معاك فيه...وينصر دينك؟؟؟
الناس مش عارفة ان الزواج قسمةونصيب...وان الرسول عليه الصلاة والسلام بعض من زيجاته كانت عن مصلحة...
ومش كل زواج بدايته مصلحة يعني نهايته عذاب ...بالعكس...لو ارتاح الزوج والزوجة..حيعيشوا احسن عيشة..
ومازال ماحدش جاوبني علي سؤالي الرئيسي......الله يرحم والديكم جاوبوا

noura كتب:

السلام عليكم ورحمة الله وبركاته

موضوع الزواج انا مع الاخوة الكرام اللي سبقوني بالرد

بالنسبة الى القبول الاكاديمي في الهندسة صعب جدا جدا جدا
انا نعرف صديق زوجي عنده درجة الامتياز من عمر المختار وعنده شهادة التوفل والجي ار اي وتم رفضه من الجامعات الامريكية المرموقة (السبب تحصيلك العلمي ليس قوي) غريبة !؟ عنده الامتياز وتحصيله العلمي مش قوي ...

والشئ الثاني لايحق للمرافق الدراسة الاكاديمية او دراسة اللغة الا بنصف دوام ولايحق استكمال دراستك الا بعد تغيير التاشيرة من F2 الى تاشيرة F1

فكر جيدا قبل القدوم على هذه الخطوة اللي ممكن تنهي فيه حياة الزوجية والعلمية
وربي يوفقك ويسدد خطاك ويحقق مافي بالك

اخي الكريم من البداية انا رديت عليك
وقتلك ان الطالب المرافق يجب عليه اولا تغيير تاشيرته
وبعدين توفير قبول اكاديمي
ثم يجب ان يكون الطالب مستوفي الشروط ومن ثم يقدم على طلب الضم
واللي هو اصبح صعب شوية عشان قصة توفير القبول الاكاديمي وقصة تغيير التاشيرة لانها تأخذ شوية وقت
طيب ليش ماتغير لاستراليا لانها اضمن في موضوع الضم بسبب عدم تغيير التاشيرة وتوفير قبول اكاديمي؟
ربي يوفقك ويسدد خطاك

السلام عليكم ................. عندما يكون الرباط الغليط .............سلك رفيع بين ايدينا عندما يظلم الرجل نفسه ويظلم امرة مسلمة معه .................. يا اخي ادا كتب لك الايفاد سوف ياتي الي بيتك ويطرق بابك وادا لم يسخر الله لك سوف لن تسفر ولو اجتمع العالم علي سفرك .................... لم نحن لا نؤمن بالقدر للاسف الايمان ضاع في منتصف الطريق والدين اصبح عادة و الدنيا هي الغاية .................... ليتك كانت قصتك بالعكس هو انك وجدت فتاة صالحة ولا تريد ان تسفر واانت متمسك به وتفكراااا في الغاء سفرك من اجل هدا الفتاة ................لان الله دكر حسنة الدنيا والاخر هي المراة الصالحة والجنة ولم يدكر حسنة الدنيا ايفاد واموال ومركز علمية ولكان ادا هدا المراة صالحة تمسك به ولو كانت مرافق له فقط لن الله لن يخيب رجاءك وكانت نيتك الدين وليس الدنيا وستجد الدنيا والدين اجتمعوااااا مع بعض ...................................

السلام عليكم
الاخ/ ولد بنغازى
نحب انقولك ان عندى صديق ماشى مرافق مع زوجته وعنده ارعة صغار وبعد سنتين يدرس فى معهد اللغة الان ماشى اموره .
لكن عندى ليك نصيحة وهى حاول تاجل موضوع الصغار فى البداية لان من الصعب على زوجتك الدراسة .
واعتبرها نصيحة لان الموقف هذا ممكن مش توصله الى ان توقع فيه
وشكرا
انشاء الله ربى يبارك لكم فى زواجكم
والسلام

يا أخي الاسد الليبي مافهمتش شن تقصد...انت حبيت تشارك وخلاص
كيف يظلم الرجل نفسه وامراة مسلمة...؟؟؟
ليش التشدد هذا كله...الدين يسر يا اخي وليس عسر.....الله سبحانه رخص لنا الزواج
واللي درته مش عيب او حرام...ومستحيل اني نتخلي علي زوجتي اذا صار نصيب...افهم الموضوع يا اخي قبل ما ترد هالرد القاسي....
وبعدين شن الحرام لو اني نفكر في حسنة دنيا...سبحان الله ...لا رهبانية في الاسلام..والمؤمن القوي خير وأحب الي الله من المؤمن الضعيف...
هل لو تعلمت و تثقفت جيت نفعت بلدي والمسلمين معناها هكي غلط وحرام
اتقي الله في كلامك وما تحكمش بغير علم.... نحنا اهل ليبيا تفكيرنا مش حيتغير لحد ما تقوم القيامة....

شكرا عالنصيحة يا اخي mah
وهل صديقك قدر انه يحصل قبول .؟