دخول



ملتقى الطلاب الليبيين للدراسة في الخارج، اخر قرارات الإيفاد، التفويضات، إدارة البعثات


descriptionلماذا تتأخر المنحة في الساحة المصرية؟؟؟؟؟؟؟؟ Emptyلماذا تتأخر المنحة في الساحة المصرية؟؟؟؟؟؟؟؟

more_horiz
السلام عليكم
الاول : نزلت المنحة؟
الثاني: لا مازال مانزلت، اليوم كنت في المصرف ومافيه شئ نازل.
الاول: ماقالولك امتى بتزل؟
الثاني: لا قالوا اول ما يوصل المبلغ من سفارتكم.
الاول: باهي كلمت السفارة؟
الثاني: وباريتني ما كلمتهم، ماردوش عليا، درت رجليا في غمري وامشيتلهم، اول ما خشيت وسألت قالوا التفويض مازال ما وصل من ليبيا.
الاول: كيف ؟ والساحات الثانية منحتهم نازلة من اسبوع.
الثاني: بالك الفاكس عاطل, ولا باعتين التفويض مع سواق السوبرجيت والسوبر جيت خربت في السلوم، ماهو التفويض ثقيل من كثر المبلغ لدرجة السيارة طاحت في الشليوني امتع السلوم.
الاول: تي والله لو التفويض جاي كعابي راهو واصل من يومين. زعمة مش تأخرت باش اينزلوا معاها الزيادة اللي قالوا عليها.
الثاني: و الله عندي احساس بينزلوا الزيادة وبيشدوا المنحة.
الاول: توقع كل شئ، لأن المسؤل اللي ايخلي طالب ليبي ينطرد من شقته لتأخره في دفع الايجار ممكن ايطلع قرار ويقول انتم مش لازم تسكنوا في شقق روحوا لبلادكم واقروا بالمراسلة والزيادة تكفيكم في ليبيا.
الثاني: انقولك حاجة انا بناخدها من قصيرها وبنروح لليبيا اتروح معاي؟
الاول: والمنحة كيف بنسحبوها من المصرف لما تنزل؟
الثاني: حتى هيا ناخدوها من قصيرها ونمشوا للمالية في ليبيا وناخدوها من غادي انلحقوا عليها مش التفويض ماوصلش، ومش بعيد حتى الشهادة بناخدوها من غادي.
الاول: خلاص امشي احجز التذاكر ونتلاقو في المطار.
الثاني: خلي تنزل المنحة باش نشروا التذاكر، ولا انقولك انشدوها كعابي بالك نتلاقو مع التفويض في الطريق!!!!!!!!!!!

هذا تصور لحوار بين طالبين ليبيين في الساحة المصرية، معتمد على احداث واقعية مع بعض التصرف من قبلي وهو حوار يظهر ما يعانيه الطلبة نتيجة لتاخر نزول المنحة بإستمرار.
ولكم حرية التعليق

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
هاهاهاااااااااااااه والله محادثه جميله جدا وفكاهيه بمعنى الكلمه وفعلا الجماعه عندنا في مصر مش متعاونين بكل واكثر شئ يرقي الضغط لما تبدا تستنى في ورقه معينه وتكون مصوقرها من 24 تركينه وتمشيلهم وانت تقول في خاطرك " خلاص خلي يوروني اليوم شن بيقولوا هوينا كلمت جماعة ليبيا وقالولي الورقه بعثناها وتمت ...بنشوف شن صار " وتمشي وتتفاجئ بأن يقولولك النت واقف ..!!!! بالله عليكم هذا كلام معقوله ..!!!كان نتكم مايخدمش تقعد الاجراءات واقفه ...وتقوللهم " وباهي وبعدين ..." يقولولك " ولاقبلين راجعنا بعد يومين << مااسهلها هذه عندهم ؛ وتوا نشوفوا " وفعلا الطالب المسكين يصدق ويجيهم بعد يومين بالضبط " ياجماعه شن صار ..!!" فيقولوله " ماصار شئ النت قاعد خارب ..!!" ياودي غر اعطوني التصريح وانا نستقبلها هالورقه برا " لالا هذه اجراءات لازم منها "<< في حياتي ماكرهت حاجه زي الاجراءات الروتينيه ، وتمر الايام وفجأه وأخيرا يتصلح نتهم وتوصلهم الورقه ولكن بعد شنوا بعد ماقريب يركبك السكر والضغط حقا مع بعض المكاتب الشعبيه لاتستغرب اي عذر يقولوهولك ..................والطرائف والقصص اللي معاهم هلبا لكن ...... ربي يهدي عباده

عدل سابقا من قبل متاابعه في الخميس 06 مايو 2010, 5:44 pm عدل 1 مرات

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
شكر

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
مساء الخير

مــأزق ثقافي ومعضلة أكاديمية لما هم الطالب العلمي والتحصيلي ينحصر فقط بإنتضار المنحة والزيــادة !!

ومأساة بحق الوطن الطيب لما الطالب ايغيرمن ساحة لأخري وهو كل همه الساحة تلك ارخص من هذه والجيب هناك سيمتليء اكثر من الجيب هنا !!

الحمدلله ليس كل الطلبة كذلك ...

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
السلام عليكم
يا اختي متابعة الادهى والامر انه النت واقف بس الموظقين خاشيين على الشات، وعيني عينك هدرزة ولقني في وقت العمل، شني النت واقف على الورق بس، ولا طلع شات جديد من غير نت، بالك فيه شات بالتخاطر، العلم قوي وممكن اتصير.
هههههههههههه

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
اتفضلوا اليوم 3 من الشهر يعني شنوا يبونا نخبوا ولا نرقدوا في الشوارع ولا انوهبوا ماكلت صغارنا؟
شئ مافهمتاش, ليش الايفاد مادام مش قادرين عليه ريحونا وخلونا في بلادنا؟؟؟؟؟؟؟؟؟؟؟؟؟؟؟؟

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
نزيدك من الشعر بيت ياأبوصقر
المنحه نازله في الساحه الألمانيه
لكن الباين أحنا مش طلبه والامش تبعهم والاالمنحه راحت في الصحراء
بصراحه مش عارف الباين المانيا عند البعثات طلعت اقرب من مصر
ربي يهديهم إن شاء الله

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
االسلام عليكم
يا خوي خود باقي القصيدة حتى امريكا نازلتلهم المنحة من اسبوع، وسوريا ايضا، يعني استنى بعشاك لين ايجيك الزيت من غريان.

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
ما عندنا ما نقول الإ لاحول ولاقوة الإ بالله العلي العظيم .
ربي يساعد الطلاب الليبيين وين ما كانوا ، لأنهم والله يبذلوا في مجهود من جميع النواحي مش بس في الدراسة

استغراب

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
مش المنحة بس تتاخر حتى تسديد مصاريف الجامعة مايسددوها نين ينشف ريقك وتسمع من هالمصرية مايسم البدن والمشكلة تلقى الطلبة الكويتيين والاماراتيين والسعوديين خير منك حال امورهم ماشية واجراءاتهم مزبوطة رغم ان ليبيا اقرب من الكويت والسعودية والامارات والله شيء يبعث الحزن والاسف في نفس الواحد (الله المستعان ربي يوفق الجميع ويصلح الحال )

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
اليوم 9 ومازالت المنحة مانزلتش بااله اي حد فالقاهرة يقولي شنو السبب معقولة تسع ايام في شهر خمسة ومازالت ماجا الراتب لاحول ولاقوة الا بالله

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
لا تعليق

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
يا سيدي الفاضل كل الطلبة في مصر يعانوا من عدم نزول المنحة والله في ناس اتسلفت وناس قريب تنطرد من سكنها يعني ما يحدث هو بالفعل مشكلة، فإن كان المسؤلون لا يعلمون فتلك مصيبة، وإن كانوا يعلمون فالمصيبة اعظم،
بس انا لما فكرت في الموضوع القيت سبب ممكن ايكون وراء تاخر نزول المنحة هذا الشهر
زعما مش يبو الطلبة ايكونوا امفلسين باش مايمشوش لمباراة الاتحاد وديروا مشاكل.

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
على فكرة فيه اغنية جميلة لما كنا صغار ويرفعونا المدرسة رحلة انغنوا فيها واحنا امروحييين
اتقول:
( روحوا بينا ،،، نبوا امالينا،،،وكان مازلنا انجوكم قصوا رجلينا)
و الله اليومين هادم خاطرة عليا هلبة هههههههههههههههههههههههههه

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
أخر خبر سمعته أن يوم الأربعاء ينزل المرتب يعني يوم 12
مش كان زادو يومين ونزلوه مع الشهر اللي بعده أحسن
ربي يهديهم وخلاص

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
الله ايبشرك بالخير اخي زكريا
بس نبي نعرف سبب التاخير وهل سيتكرر مرة اخرى
كان هذا الواحد يدير حسابه للشهور الاخرى
تحياتي والف شكر

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
نفكر نمشى مصر بش بعد ماسمعت منكم يلى سمعته قلت ماناقصنى غير الشحورة والجرى وراء سفارة ربى بعونكم ويفرجها عليكم

descriptionلماذا تتأخر المنحة في الساحة المصرية؟؟؟؟؟؟؟؟ Emptyرد: لماذا تتأخر المنحة في الساحة المصرية؟؟؟؟؟؟؟؟

more_horiz
اغلب الطلبة لم يستلمو بدل الكتب والتذاكر النصفية وحيث اننى طالب فى كلية الاسنان فاننى اشترى الكتب وبعض المستلزمات للعملى من ادوات وغيرها بسعر مرتفع جدا

descriptionلماذا تتأخر المنحة في الساحة المصرية؟؟؟؟؟؟؟؟ Emptyتفألو خير يا أبنائي الكرام

more_horiz
ان شاءالله القادم احسن sunny
صلاحيات هذا المنتدى:
لاتستطيع الرد على المواضيع في هذا المنتدى